10 олаште 10 километр дене куржын

Игорь Николаевич дене шочмо кундемышкыже, Мишкан районысо У Эшым ялыш, унала толмыж годым вашлияш пиал шыргыжале. Иктаж шым-кандаш суртан шып ужар ялыште верланыше шочмо суртыштыжо кызыт тудын аваже, 83 ияш Сима Николаевна, ила. Тышечын рвезе кажне кечын пошкудо Ардаш ялысе школыш шинчымашым погаш куржталын, тышечын кумда илыш-корныш наҥгайыше йолгорныжо шуйнен.

1981 ийыште Ардаш кыдалаш школым тунем лекме деч вара И. Петкин Бирск кугыжаныш пединститутын физика да математика факультетышкыже тунемаш пурен. Икымше курсышто пикш дене классический йӧн дене лӱйкалыме секцийыш кошташ тӱҥалын. Тунемме кокла гыч тыршен тренироватлалтмын, таҥасымашлаште, кеҥежым пединститутын Узеть ер воктене верланыше лагерьыштыже шуаралтмын лектышышт сай лийын - нылымше курсышто тунеммыж годым «Пикш дене лӱйкалымаш дене СССР спорт мастер» лӱмым налын.

Тудо ийлаште самырык специалист-влакым распределений почеш пашаш колтылыт ыле. Тыге 1986 ийыште дипломым кидыш налме деч вара 20 ӱдыр-рвезе дене пырля И. Петкинат Свердловск областьыш корным кучен. У тунемме ий гыч Камышлов районысо Захаровский кыдалаш школышто физикым да математикым туныкташ тӱҥалын. А шыжым тудым Совет Армий радамыш налыныт. Эл ончылно шке порысшым шуктымек, ты школышкак пӧртылын, ик жап гыч физкультурым туныкташ тӱҥалын, волейбол, баскетбол секций-влакым намиен. Тунемше-влакым походыш кондыштарыме, Тянь-Шань курыкышто 4000 метр кӱкшытан перевалыш кӱзымӧ, областьысе турслетышто сеҥен, Марий Элыш эл кумдыкысо турслетыш коштмышт, шуматкече-рушарня еда тӱрлӧ таҥасымаш-влакым тарватыме, стадионым да тушто куржталме корным ыштыктымыж нергенат порын шарналтен каласкалыш. 

Игорь Николаевичлан илыш-корныштыжо тӱрлӧ пашам ворандараш верештын: школ директорланат ыштен, Камышлов районысо спорткомитетым вуйлатен, «Обухово ял поселений» муниципальный образованийысе Думын депутатше лийын. Но, шке манмыжла, чонжылан вуйлатыме огыл, икшыве-влак дене ыштыме паша лишылрак. Тыге 2005-ше ий гыч Камышловысо педколледжыште физвоспитаний туныктышылан ышта. 2015-ше ийыште Башкир кугыжаныш университетын Бирск филиалыштыже физический культура да спорт факультетым тунем лектын.

«Мый уым кычалаш да пален налаш йӧратем, - манеш Игорь Николаевич. - Элыште пандемий шарлымылан верч ӧрдыж гыч туныкташ логалмылан кӧра дистанционно тренироватлашат, зачетым приниматлашат тунем шуым. Эре ончык ошкылаш шкаланемат иктаж кумылаҥдыше йӧным шонен луктам, ярарак жап улмо годым эре куржталам. Теве июньышто, регистрацийым эртен, тӱнямбал онлайн ультрамарафоныш ушнаш да, келшыше программым ойырен налын, тылзылан 100 километрым куржаш лиеш ыле. А мыйын 200 километрыш погыныш. Вара шкаланем вес заданийым шонен муым - июльышто 10 олаште 10 километр дене куржаш тарванышым. Тыге Волгоградыште, Саратовышто, Уфаште, Бирскыште, Сухой Логышто, Камышловышто, Богдановичыште, Ирбитыште, Талицыште куржтальым. «Европа - Азий» тӱнямбал марафонышто 42,2 километрым куржмем шкешотан иктешлымаш гай лие».

Туныктышо тунемшыже-влакланат эреак сай примерым ончыкта. Тудым ГТО физкультур комплексын шӧртньӧ знакше дене палемденыт. Интернетысе соцкылын лаштыкыштыже куржталме маршрутшо, могай таҥасымашлаште лиймыже, сеҥымыже, эше ече денат куржталаш, дартсым кышкылташ, волейбол дене модаш, колым эҥыраш йӧратымыже, волейбол командым вуйлатымыже нергенат тӱрлӧ уверым верешт кертына. Спорт - тудын илышыже, эн йӧратыме сомылжо. А Физкультурникын кечыжым кеч-кунамат еш дене пайремлат, вет Игорь Николаевичын пелашыже Светлана Михайловнат физкультур туныктышо улеш, да кок ӱдырыштымат спортлан шӱмаҥден куштеныт.

Авторын да еш архив гыч налме фото-влак.