Каныш кече йоча-влаклан пайрем гай лийшаш

Павасола-влак кодшо рушарнян тыгак ыштеныт. Ий ӱмбалне. Пайдале йӱла, тудым ялыште тукым гыч тукымыш арален кодымо нерген ойлаш гын, эн ончычак йоча-влакын жапым кузе эртарымыштым шарналтыман. Пӱя ӱмбалсе ийым ужын, шуматкечын ола гыч шочмо ялышкыже мийыше Светлана Ибрашеван ушышкыжо шонымаш толын пурен: «Владислав Баязитов йоча-влак дене пырля тиде катокым эрыктен шога, а молан поро пашаштым палемдаш, эшеат шукырак йочам коньки дене мунчалташ лекташ кумылаҥдаш огыл? Молан нуно эре компьютер воктене але телефон дене модын шинчылтшаш улыт?

А ну-ка чылаштымат тӱшка физкультпайремыш лукташ! Ожно вет йоча-влак пӧртыштӧ петыралт шинчен огытыл». Тыге тараташ шонымыж дене ялысе староста Илдус Гараевым, Снежанна пелашыжым (Тудо клубым вуйлата), ялысе депутат Майя Гареевам палдарен. Нуно вигак суапле пашам шукташ келшеныт, шуматкечын увертарымашым возен пижыктеныт, а рушарнян ялысе катокышто коньки дене мунчалташ кумылан йоча да кугурак-влак денат вашлийыныт. Кӧн конькиже лийын огыл гын, С. Ибрашева пеленже намийыме шкенжын куд мужыржым пуэн. Конкурсат лийын: ты кечын икымше гана коньки ӱмбак шогалше да тунамак мунчалташ писын тунемше-влаклан шергакан пӧлек - ий ӱмбалне мунчалтыме у мужыр спортарвер! Тыгай пиал 6 ияш Альвина Шаймардановалан, 12 ияш Изольда Изиметовалан, 14 ияш Элиса Гареевалан, 17 ияш Милана Гареевалан логалын. Ынде нунынат конькишт уло. С. Ибрашева шкеак спонсор лийын, ялчыже-влакым куандарен коден. Мунчалташ лекше-влаклан тыгак тамле «пӧлекым» кучыктеныт, Лидия Шаймарданова Меҥай ковайын вужга мелнаж дене сийлен.

Республикыште Тазалык идалыкым увертарымым шотыш налын, айста флешмоб-влак дене гына огына серлаге, таза илыш-йӱла да йоча-влакын ончыкылыкышт верч, нуно шонкален моштышо, пеҥгыде кап-кылан лийын кушкышт манын, ончычсо поро йӱлам пӧртылтена, марий яллаште моло вереат кертмына семын тыгай акций-влакым тарватена! Кӧ умбакыжат тидым илышыш шыҥдарымашке ушнаш келша, уверым вучен кодына. Издер, коньки, ече да моло массовый спортӱзгар йоча-влакын каныш кечыштым пайремыш савыраш полшышаш улыт. Кугыеҥ-влак тарватат гын... Шкеныштын йоча годсыштым шарналтен.

С. Ибрашеван фотожо-влак.

Читайте нас в

«Чолман». Республиканская общественно-политическая газета на марийском языке. Издается с 24 апреля 1991 г.

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».