Все новости
Спорт
14 Шыжа 2020, 13:26

Гагарин лӱмеш кубок мемнан кидыште!

Нефтекамск оласе 5-ше йочасадыш коштшо вич-шым ияш йоча-влак ий еда физкультур дене «Мы гагаринцы!» республикысе олимпиадыште вийыштым тергат.

Кӱкшӧ наградым - кубокым - сеҥен налаш таҥасымашын кум йыжыҥжым эрташ кӱлеш. Икымше йыжыҥ йочасадысе йоча-влак коклаште эрта. Кокымшо йыжыҥ - муниципальный (оласе) теҥасымаш-влак. Тушко икымше йыжыҥыште сеҥышыш лекше йоча логалеш. Кумшо йыжыҥ - республикысе кӱкшытыштӧ, Уфа олаште, эрта. Тушто кокымшо йыжыҥыште сеҥыше ик йоча гына мастарлыкшым ончыкта. Уфашке йоча-влак тӱрлӧ район, тӱрлӧ ола гыч погынат. Коклаштышт ик сеҥышым ойырат.
Спорт таҥасымашын кок йыжыҥжым эртен, мемнан йочасад гыч республикысе олимпиадыште Юрий Гагарин лӱмеш кубокым Лилиана Сысолетина сеҥен нале. Мыйын паша практикыштем тиде икымше кубок. Нефтекамск оласе йочасадлаштат тыгай кубокым тымарте эше нигӧ сеҥен огыл! Республикысе йыжыҥ марте мыйын ямдылыме йочам-влак кум гана шуыч, но мучаш марте сеҥышыш лекташ изиш гына вийна ыш сите. Ме Юрий Гагарин лӱмеш кубокым пеш чот налнена ыле. Садлан шуко ямдылалтна. Тиде сеҥымашлан моткоч куаненна.
Йоча-влакым туныкташ, сеҥымашыш шуаш жапдам, вийдам ида чамане! Тунам гына кӱкшӧ наградым сеҥен налаш лиеш.
Читайте нас в