Теле ечызе-влакым куандараш ок вашке

Ожно теле ноябрь тылзыштак озаланаш тӱҥалеш ыле. А ынде лум шагаллан кӧра ечызе-влак таҥасыме сезонымат У ий лишан веле почын кертыт. Эртыше декабрьыштат тыгак лие. Адакшым ечыгорнымат кӱчыкракым, 1,5-2 километр кужытаным веле (кушто лум кӱжгыт сита), ышташ логалын.

Тыгай амаллан кӧра ечызе-влак теле сезоным Калтасаште 21, а Нефтекамскыште 22 декабрьыште веле почын шуктышт. Чаманаш логалеш, нунын радамышт кажне ийын шуэм толеш. Корно тора огылат, тысе таҥасымашлашке пошкудо Удмуртийысе Камбаркыште илыше самырык ечызе-влакат ушнат. Тыге Калтасашке да Нефтекамскыш пошкудо республика гыч толшо спортсмен-влаклан кӧра таҥасыше-влакын чумыр тӱшкашт мыняр-гынат ешаралтын.

«Тений Калтасаште ечыгорнынам ончычсо деч кӱчыкракым ыштымынан амалже лум шагал улмо дене кылдалтын огыл, - рашемден каласыш тусо ДЮСШ-н директоржо М.Ш. Давлетшин. - Кеҥежым чодыра озанлыкын пашажым шуктышо-влак, пырням шупшыктышыла, ечыгорно шуйнымо верлам локтылыныт. Кызыт лум вичкыжынрак возын. Келгемеш гын, тыгай тӧрсырым петыра ыле манын шонена».

Икманаш, поктымо годым чодыра коклаште ош мераҥ изи оҥго дене кудалыштме семын, ечызе-влакат ты гана кӱчык дистанцийым икмыняр йыр дене эртеныт. Калтасаште да Нефтекамскыште сеҥыше-влакын радамыштат икгайрак лийын, южиктыже верышт дене гына вашталтыныт.

Теве Нефтекамскысе чодыра лоҥгасе ечыгорнышто икмыняр йочан марла кычкырымыже шоктыш: «Эрте, Тимур, эрте! Эрте, маньым!» Раш, Калтаса район гыч толыныт. Тыге ечыгорныш варарак лекшаш кугурак рвезе-влак изирак йолташыштым поктат, пуйто вийым ешарен пуынешт. Чынак, полша вет йолташ верч кӧргӧ чон дене вургыж тыршымышт! Тимур Мадияров (Ӱлыл Качмаш школын 5-ше классыштыже тунемше) кокымшо кайышым эртыш, но икымше лийын ыш шу… финишыш толын тӱкныш.

Шола гыч: Даша Прокопенко, Гульназ Гимадрисламова (11-ше школ), Аня Андрьянова.
Авторын фотожо-влак.

Тӱрлӧ ийготан тӱшкаште сеҥыше-влакым посна палемденыт. Ӱдыр-влак коклаште кок вережат чемпион лӱмым Нефтекамскысе машиностроительный колледжын тунемшыже, марий ӱдыр Аня Андрьянова сулен.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».