Кум гана Россий спорт мастер

Биатлон телым ушештара гынат, спортын тиде видше дене кеҥежымат таҥасат - ече олмеш роллерым чият але кроссым куржыт. 2010-2012 ийлаште Луиза кеҥежымсе биатлон дене Россий юниор-влакын сборный командыштышт шоген, Европысо чемпионатыште призер-влак коклашкат логалын. Тудо ийлаште Европын кеҥежымсе чемпионатшым эртарыме результат-влакым шергалын, оҥай уверым муын луктым: биатлон дене Российын юниор сборныйыштыжо тунам кум марий спортсмен лийын - Луиза Дмитриева, Вадим Кутлияров (Мишкан район Пӧкленде ял гыч), Надежда Белкина (Марий Элысе Звенигово район, варажым тудо Россий гражданствым вашталтен да Украин биатлонист-влакын сборныйышкышт каен).

2010 ий 14 августысо протоколым ончалаш гын, 5 километран преследований дисциплиныште Российысе юниор ӱдыр-влак коклаште Луиза Дмитриева эн сай результатым ончыктен - Польша гыч Моника Хойниш (Тудо кызытат шке элжын ӱдырамаш сборныйыштыжо выступатла.) да украинка Татьяна Трачук почеш кумшо верым налын. Надежда Белкина кудымшо лийын.

Луиза Дмитриева Калтаса районысо Калмиямучаш ялеш шочын-кушкын. Школ деч вара Стерлитамакыште физкультур колледжым да туштак Урал кугыжаныш физический культура академийын филиалжым тунем лектын. Конешне, тунеммаш дене гына серлаген огыл: мучашдыме тренировка, сбор, таҥасымаш-влак…

Тыге талантан ӱдыр ӱнаржым таптен, вий-куат памашыже спортышто корным почаш полшен. Телымсе полиатлонышто да биатлонышто спорт мастер кӱкшытыш шуын. Но кӱкшӧ достижениян спорт - тиде тыглай физкультур огыл. Юмо кеч-могай ӱнарым, талантым пуа гынат, тыште чытымаш, тыршымаш да эше… шагал огыл шийвундо кӱлыт. Экипировкылан, тренажер ден спорт ӱзгарлан, сборыш, таҥасымашлашке кошташ да тулеч молыжланат. Тазалыкымат эскерыман, шымлыман…

Питер олашке куснен кайымыж деч вара Луиза кум ий спорт дене заниматлен огыл. 2015 ийыште шке семынже куржталаш тӱҥалын. Гатчина олаште кажне ийын эртарыме «По аллеям истории» кроссышто вигак кокымшо верым налын. Куштылго атлетика дене заниматлыше-влакым ушен шогышо «Спирос» клубын тренерже Вадим Дроздов ӱдырым шкешт деке ӱжын. Тыге ечызе да биатлонист ӱдыр вучыдымын шкенжым куштылго атлетикыште тергаш тӱҥалын. Лу уштыш гыч пелмарафон марте кутышан куржталме корныжо Питер, Гатчина, Томск, Краснодар олала марте шуктен, ик гана веле огыл сеҥымашке шуын, а 2017 ий 21 майыште Москвасе пелмарафонышто чемпион лийын. Ӱмаште шошым адак Москваште 21 километр кутышан таҥасыме корныш лектын да кокымшо верым налын.

Ӱдыр шканже иктешлымашым ыштен: тудлан кеҥежым куржталаш (поснак кужу дистанцийыш) ече спорт дене заниматлыме деч утларакат келша улмаш.

Тыге марафонлан ямдылалташ тӱҥалын. Тений 22 сентябрьыште Москваште икымше гана 42 километр кутышан корнышко таҥасаш лектын. Мо, шонеда? Тӱнямбал кӱкшытыштӧ престижный марафонлан шотлалтше таҥасымашке икымше гана ушнышо марий ӱдыр кокымшо толын! А тиде эше ик кӱкшытым налмаш - куштылго атлетикыштат Россий спорт мастер нормативым темен.

Кугу сеҥымаш кушеч шочеш? Луизалан тудо Калмиямучаш гыч тӱҥалын. А лачшым гын, йоча годсо ял мучашысе ечыгорныж гычын…