Кавашке кудал кӱзынешт але Кӧ тугай «Лавыра король»?

Башкортостанын виш чемпионатшын икымше этапше 29 июньышто Нефтекамск олаште эн тале мотокроссмен-влакым чумырыш. Молгунамсылак пошкудо Удмуртий, Пермь да Свердловск кундемла гычат эн тале спортсмен-влак толыныт, мотоциклым кушкыжаш веле тунемаш тӱҥалше 7-8 ияш ньога кашакымат конденыт. Таҥасымаш тӱҥалме деч ончыч мландым нӧртен кодышо йӱр ончаш толшо-влакым мотоцикл орава йымач пыл гай нӧлталтше пуракым шӱлымӧ деч утарыш. Но лавыра чумыркаш савырныше мотоциклым заезд-влак коклаште кажне спортсменлан шкаланже але, кӧн уло гын, техгруппыжлан мушкаш да у стартлан ямдылаш логалын.

Кумшо верыш Учале оласе «Горняк» командын мотогонщикше Марсель Аюпов лекте.

Ижевск гыч 8 ияш Егор Мощевитин телым веле мотоциклыш шинчын, а кеҥежлан тыгай кугу таҥасымашке ушнен. Мо тудым таратен, могай вий полшен? Егорым ачаже стартлан ямдылалташ наҥгайымыжым ончен шогышемла, «Кузе изи ньогам тыгай лӱдыкшӧ трассыш лукташ тоштында?» манын йодмемлан аваже тыматлын пелештыш: «Шкеже ок лӱд - эн тӱҥжӧ тиде. Амалже - вӱрыштыжак, вет ачаже, Петр Мощевитин, изинекак мотокросслан шӱмаҥын кушкын, СССР-н чемпионжо лийын. Южгунам, эртышым шарналтен, шкенжым «Лавыран корольжо» лийынам манын воштылалеш».