Йӱдвел кросс - марий-влакын «кидыште». А «налыныт» тудым йол дене

А нуным тушто аклен моштат, «кидге-йолге» вигак пашаш налыт. «Сургутнефтегаз» ПАО организацийыште паша верым веле огыл пуат, спорт дене заниматлашат йӧным ыштат, пашаеҥ-влаклан тӱрлӧ таҥасымаш ден спартакиадым эртарат. Мутлан, кеҥеж сезоным 1000 метрыш куржмо кросс дене почыныт. Ты таҥасымашке «Сургутнефтегаз» компанийын 38 структурный подразделенийже гыч куштылго атлетика дене кылым кучышо 257 еҥ лектын. 165 пӧръеҥ куштылгоатлет коклаште «Федоровскнефть» НГДУ-што пашам ыштыше марий рвезе Алексей Шамшиев сеҥен (2 мин. 29,1 сек.). «Сургутнефтьспецстрой» трест гыч Кирилл Семечкин кокымшо результатым ончыктен (2 мин. 30,4 сек.), Георгий Рочев кумшо лийын («Сургутнефть» НГДУ, 2мин. 30,8 сек.).

Алексей Шамшиев Мишкан район Чорай школышто да вара колледжыште тунеммыж годым тале легкоатлет семын шуаралт кушкын, 400 да 800 метр кужытан дистанцийлаште ныл гана Российын чемпионжо лӱмым сеҥен налын.

Сургутысо таҥасымашын протоколыштыжо Мишкан район гыч эше ятыр рвезын лӱмжым муаш лиеш. Призерыш логалын огытыл гынат, шукышт ончыл верыште улыт: Эдуард Айгузин - нылымше, Дмитрий Айгузин - кандашымше (Нуно изак-шоляк улыт.), вара Станислав Иманов, Виталий Шумаев (луымшо, латкокымшо лийыныт), умбакыже Артур Давлетов, Александр Назмиев…

Алексей Шамшиев, Эдуард ден Дмитрий Айгузинмыт, Станислав Иманов чыланат ик вере пашам ыштат, садлан нунын результатыштлан кӧра (Ныл пӧръеҥын да кок ӱдырамашын эн сай результатыштым онченыт.) «Федоровскнефть» НГДУ чумыр зачетыштат 38 предприятий коклаште икымше лийын.