Марий патыр

Нефтекамск олаште шочын-кушшо коло кок ияш Дмитрий Сухарев пауэрлифтинг дене латвич ияшыж годсек заниматла. «Молан тиде спортым ойыренат?» йодмылан «Чыла пӧръеҥ семынак кумда туп-вачан лийме, чогашылым куштымо шуын» манын вашештыш. Тыге шкем сай могырыш вашталтыме шонымаш рвезым Российын спорт мастерже кӱкшытыш шуктен!

А тӱҥалын чылажат таза илыш-йӱлам, спортым йӧратыме кумыл деч. Спорт дене рвезе изинек кылым кучен - футбол дене модын, рукопашный бой, неле атлетик дене заниматлен. Ик жап гыч, изи огыл вий-куатшым шижын, пауэрлифтингыште шуаралташ кумылаҥын.

Тиде шонымаш дене латвич ияш рвезе телым «Венед» спорт рӱдерыш уста тренер Владимир Обожин деке миен. Но тудыжо рвезым вигак налын огыл, кеҥежым толаш шӱден. Тиде тренер Диман пӱрымашыштыже пале кышам коден. Спорт клубыш мийыме годым Дима 56 килограмм нелытан лийын гын, тренировкылан кӧра кок тылзе жапыште коло килом ешарен. Тыге рвезе куд ий тренировкыш коштын. Вийым пыштен шуаралтмаш шке лектышыжым пуэн - Димам тренерже республикысе таҥасымашке кондыштараш тӱҥалын. Рвезын мутшо гыч, тудлан эн чотшым Салават оласе икымше таҥасымаш шарнаш кодын. Тунам рвезе ийготшо дене шке категорийыштыже, 74 килограмм марте нелытан-влак коклаште, таҥасышаш лийын. Но тугодым кап-кыл нелытше 74 килош шуын, садлан Дима, командыжлан ешартыш очком кондаш шонен, ик суткаште кум килом ешарен да 83 кило марте нелытан пӧръеҥ-влак тӱшкаште таҥасен! Тугодым тудо нылымше верым налын. А «жим лежа» видыште Дима 117 килограмман штангым нӧлтал сеҥен! Салават оласе таҥасымаш шке вийлан ӱшаным пеҥгыдемден. Тыге вес ийжылан Дима пауэрлифтинг дене Башкортостан Республикын кубокшо верч Кумертау олаште 93 кило марте нелытан-влак тӱшкаште таҥасен. Мутшо гыч, конкуренций кугу лийын: тушко Российын спорт мастерже-влакат вийым тергаш миеныт. Кумертау олаште рвезе луымшо верыш веле лектын гынат, чумыр балл дене спорт мастерыш кандидат нормативым темен! Тугодым 225 килограмман штанга дене приседанийым ыштен, туп дене возын («жим лежа»), 170 килограммым нӧлталын, «тяга становая» видыште 215 килограммым сеҥен. Куанле увер латшым ияш спортсменлан пуйто шулдырым ешарен - Дима пауэрлифтинг дене эшеат кыртмен заниматлаш тӱҥалын да кум ий гыч Россий спортын мастерже кӱкшытыш шуын! «Кугу сеҥымашыш шуаш шонымаш ушышто уке ыле. Келшен да заниматленам. Чылажат тыге савырна манын, шонен омыл, - каласкала Дима. - Спорт мастер лияш ямдылалтме годым илышем изиш вашталтын - пел ий уремыш лектын омыл, утларакшым кочкынам, маленам да тренировкыш коштынам. Авам келшыше кочкышым ямдылен. Нелыт ынже йом манын, стресс деч аралалташ логалын». Таҥасымаш годым рвезын кап-кыл нелытше 119 килограммыш шуын. Тунам пауэрлифтингын кум тӱрлӧ видыштыже чумыр шотлымаште нӧлтымӧ штангын нелытше 845 килош шуын. Тыге спорт мастерыш нормативым 15 килолан эртарен. Тулеч вара самырык спортсменым Башкортостанын сборный командыж дене Нижегородский областьысе Арзамас олаш Приволжский федерал округын чемпионатышкыже колтеныт. Тиде Диман Россий кӱкшытан икымше таҥасымашыже лийын. Тушто тудо 120 кило марте нелытан-влак коклаште таҥасен (Нӧлтымӧ штангын чумыр нелытше 900 килош шуын.). Россий кӱкшытыштӧ тудо эн самырык спортсмен лийын. Мо оҥайже, рвезе экипировочный тӱшкаш пурен гынат, ешартыш экипировко деч посна выступатлен да Россий таҥасымаште шке ийготшылан келшыше нелытан-влакын категорийыште кокымшо верым сеҥен толын! Тыгодым элысе 150 пауэрлифтер коклаште Дмитрий кап-кыл нелыт коэффициент дене лу эн виян спортсмен рейтингыш пурен.