Спортсменым шарныме лӱмеш

Таҥасымаш, тунемше-влак гыч тӱҥалын, ече, спорт ветеран-влак марте шуко еҥым чумырен. Эн кугу ийготан 89 ияш Сергей Салякин лийын. Тудын мутшо почеш, изиж годсекак ече деке шӱман улеш, сандене теният спорт пайрем деч ӧрдыжеш кодын огыл.

Таҥасымашым Мишкан район спорткомитетын председательже Р. Ямаев почын, ечызе-влакым район администраций вуйлатышын социальный йодыш шотышто алмаштышыже Л. Александрова саламлен. Варажым Денис Тимиркаев дене ожно пырля куржталше, пашам ыштыше спорт ветеран-влаклан мутым пуэныт, лӱмлӧ ечызе да тренерын Ольга ӱдыржӧ ачаже нерген каласкален. Таҥасымаште шуко гана паралимпийский чемпион, ече дене заслуженный спорт мастер Кирилл Михайлов лийын.

- Мыят Д. Тимиркаевым сай могырчын гына шарнем, - каласкала таҥасаш толшо, кудло ийым эртыше спортын ветеранже Л. Ибагишева. - Тунамсе самырык еҥ-влак спорт дене кылым чот кученыт. Мыят ик гана ече деке шӱмаҥынамат, ӱмыр мучко ом кудалте.

…Кок арня ончыч поранан игече шогымылан кӧра таҥасаш толшо-влак мӧҥгеш савырнен каеныт. Тиде гана мотор, шошо игече лийын, спортсмен-влакын чоныштым куандарен, ечыгорныш сымыстарен ӱжын. Эн ондак изирак ийготан-влак стартыш лектыныт, а варажым - кугурак класслаште тунемше, тале спортсмен ден спорт ветеран-влак. Тиде кечын чылаже шӱдӧ утла еҥ ечыш шогалын, ГТО нормативымат сдатленыт. Кажне тӱшкаште сеҥыше ден призер-влакым Чап грамот дене палемденыт, шарнымаш пӧлекым кучыктеныт.

Районысо мероприятий спонсор-влак деч посна эртен огыл. Организатор-влак С. Васюткинлан, Б. Танцитовлан, А. Байназовлан, «Чолман» газет редакцийлан кугу таум каласат.