Нефтекамскын ечызыже - Озаҥ марафоныштат оза

Кодшо каныш кечылаште ече таҥасымаш Тӱнямбал кубокын пытартыш этапшын радамже почеш Холменколленысе марафон уэш шке «капкажым» почо. Пӧръеҥ-влак коклаште икымше ныл верым Российысе ечызе-влак А. Большунов (Белгород областьыште шочын-кушкын), М. Вылегжанин (Удмуртий гыч), А. Ларьков (Татарстан), И. Семиков (Коми Республика) нальыч.

Ече марафоным тӱҥ шотышто теле таҥасымаш-влакым мучашлыме годым эртарат. 10 мартыште Озаҥыште, ола воктенсе Юдино поселкышто, пӧръеҥ да ӱдырамаш-влак 50 километран ечыгорныш лектыныт. Татарстанысе марафонын (Тудым 1968 ий гыч эртарат.) чапше пытартыш жапыште кумдан шарлен толеш. Тыште ече спортын вияҥ толмо кӱкшытшымат палемдыман - ий еда Татарстанын ятыр ечызыже Российын сборный командышкыже логалеш.

Марафоным почмашке организатор-влак совет жап гычак ече спортын легендыжлан шотлалтше Николай Зимятовым (Олимпиадын ныл гана чемпионжо), Тӱнямбал кубокым кок гана сеҥен налше, кум гана олимпийский призер лийше Александр Завьяловым ӱжыныт. Олимпиадыште кок гана сеҥыше, тыгак кумдан палыме ечызе Ольга Данилова почетан уна-влак радамыште поснак вучымо лийын, вет тудо Бугульма олаште шочын, а вара Альметьевскыште ечызе семын мастарлыкшым шуарен кушкын.

Шкеныштым изирак дистанцийыште тергаш кумылан-влаклан 25, эсогыл 5 километр кутышан дистанцийлашкат лекташ йӧным ыштеныт. Тек шукырак ечызе, яндар южыш лектын, вий-куатше да ӱнаржылан кӧра тӱшка таҥасымаш шӱлыш авалтымым шижеш. Витле уштышым эртыме «кинде сукырым» ечызе-влак кокла гычат чылан огыл «катен налын» кертыт.

Чумыр таҥасымашын призовой фондшо тений 1300 000 теҥге лийын. Пытартыш ийлаште марафоным эртараш оксам Татарстан Республикысе Ече таҥасымаш да биатлон федерацийын президентше, Российысе Ече таҥасымаш федерацийын вице-президентше, «Сетевая компания» ОАО-н директоржо Ильшат Фардиев ойыра.

Эн кужу дистанций эн шуко ечызым чумырен. 263 пӧръеҥ да 22 ӱдырамаш финиш марте шуыныт. Витле уштышыш куржмаште Рауль Шакирзянов сеҥен, ече спортышто тудын лӱмжӧ кумдан палыме (Пермский край гыч, эше Мордовийын чапшым арала.), Удмуртий гыч Кирилл Вичужанин кокымшо, Артем Николаев (Татарстан) кумшо лийыныт. Абсолютный зачетышто ончыл 10 верым налше-влакым призерлан шотленыт да нунылан окса премийым кучыктеныт. Сеҥыше Рауль Шакирзяновлан 150 тӱжем теҥге логалын. Нефтекамск гыч ече дене СССР спорт мастер Валерий Гарейшин абсолютный призовой верыш логалын огыл гынат, шке ийготанже-влак (55-59 ияш) тӱшкаште кокымшо верыш лектын, тудланат окса сертификатым пуэныт. Витле уштышыш таҥасымаште ӱдырамаш-влак гыч эн тале Мария Давыденковалан чемпионкын грамотыж дене пырля призовой фондын 100 тӱжем теҥгеаш сертификатше ешаралтын, Жанна Муравьева кокымшо толын, Лариса Рясина кумшо верыш лектын. Нуно чыланат Татарстан гыч улыт. Ӱдырамаш-влак коклаштат ончыл 10 верым призовойлан шотлымо.

25 километрыш таҥасы-маште 60 пӧръеҥ да 21 ӱдырамаш финиш марте шуын кертыныт. Кажне дистанцийыште да посна ийготан-влак тӱшкаште призовой верым налше-влакым сертификат да пӧлек-влак дене палемденыт. Таҥасымашке ушнышо 600 утла ечызылан шарнымаш медальым кучыктеныт.