Чемпионат сай шарнымашым коден

Сеҥыше-влакым увертарыме татым поснак шӱм вургыжын вучышна. Теве тудо - эн виян гонщик - британ спортсмен Льюис Хэмилтон! Чемпионлан сулен налме кубокым Россий Федераций Президент Владимир Путин кучыктыш. Чемпионатыште Российын чапшым аралыше ик пилот веле ыле. Сергей Сироткин таҥасымаште 18-ше верым нале.

Тыгай кӱкшытан таҥасымаш кум кече эрта, но программыште ныл кечеманын палемдыме. Нине кечылаште ме питлейныш-те (таҥасымашлан йӧнешта-рыме трасса) команде-влакын ямдылалтмыштым ужна, автограф-сессийыш ушнышна, кумдан палыме «Ленинград», «Би-2» группо-влакын концертыштым, «Comedy Club» воштылчык шоум, МиГ-29 реактивный истребитель чоҥештылмым, «музык фонтаным» ончышна. Но мылам эн чот «Драйв ден мотор-влакын фестивальышт» манме пайрем келшыш. Тушто дрифтым, джимханам (автотранспортын видше-влак), мотофристайлым (трамплин гыч акробат семын тӧрштылмаш), сноумбайлым (трамплин гыч снегоход дене тӧрштылмаш) эскерымашым кугу куанлан шотлем. Ретро-автомобиль-влакым вераҥдыме выставка, радиоуправляемый машина-влакын таҥасымашышт куанаш лийше шарнымашым кодышт. Эше кӱкшӧ курыкан вер-шӧрыштӧ верланыше Красная Поляна курорт поселкысо тӱнямбал кӱкшытан «Роза Хутор», «Альпика-Сервис», «Газпром», «Лаура» курортлаште лийме тат чонем кужу жап вӱчкаш тӱҥалеш.

Мут толмашеш, «Формула 1» Тӱнямбал чемпионатым эртараш контрактым 2025-ше ий марте шуйымо. Садлан тиде чынжымак «королевский» таҥасымашым кажныда шке шинчаж дене ужын кертеш!