«Футбол деч посна илен ом керт!»

- Йӧратыме ешем гаяк, эн ончылно улеш. Ешем, тыгак шочмо кундемыштем авам-ачам мыйым эре сай лектыш дене пӧртылмем вучат.

- Футбол дене 4 класс годсек модам. Икымше тренерлан Калмаш школын физкультурым туныктышыжо Г.С. Фаюршиным шотлем. Йолташем-влак дене ялысе футбол пасушто урок, сурт паша деч вара, пычкемышалтмеш, мечым чуменна! 9 класс деч вара Калтаса селасе кокымшо школыш тунемаш кусненам. Кум шагатеш, урок деч вара, мӧҥгӧ пӧртылынам, йӧратыме авам-ачамлан сурт озанлыкыште полышкаленам, вара, куд шагат кастене пытартыш автобусыш шинчын, уэш Калтаса селасе спорткомплексыш футбол дене тренировкыш каенам! Занятий пытымеке, угыч остановкыш вашкенам… А уремыште тиде жаплан йӧршын пычкемышалтын, машина-влак коштмым чарненыт. Садлан Калтаса села гыч Калмашыш мӧҥгӧ кажне кечын 8 километрым йолын куржынам!.. Мут толмашеш, илышыштем чын корным муаш полшымыштлан Калмаш школ директор Константин Раянович Ибаевлан, икымше туныктышем Любовь Сапиевна Ибаевалан, класс вуйлатыше Светлана Шакиевна Шамаевалан, физкультурым туныктышо Геннадий Сапиевич Фаюршин ден Калтаса селасе футбол командын тренерже Олег Викторович Байдугановлан вуем савем.

- Футбол дене яра жапыштем заниматлем. А тӱҥ пашам: пожарыш, аварийыш - икманаш, неле илыш ситуацийыш логалше-влакым туткар гыч утарымаш. Кызыт МЧС структурышто пашам ыштем. Шкеже Уфасе механико-технологический колледжым тунем пытаренам. Екатеринбург олаште кандашымше ий илем, спорт таҥасымашлаште тиде кундемын чапшым аралем.

- Ондак кок ий Нижние Серги оласе «Металлург» командыште модынам. Лач тугодым Свердловск областьын футбол дене первенствыштыже кубокым сеҥен налынам. Тидым икымше сеҥымашемлан - титуллан - шотлем.

- Ик жап гыч Михайловск оласе «Жасмин» футбол клубыш модаш кусненам. Кызытат тиде оласе футбол командын чапшым аралем. «Жасминыште» модмо жапыште кок гана Свердловск областьын чемпионжо лийынам. Эше Екатеринбург олан чемпионатлаштыже Березовский оласе «Спартак» футбол клубын командыштыже шуаралтам. Тений тыгай чемпионатыште кокымшо верым налынна. «Спартакыште» модмо годым 2018-ше ийыште соперникын футбол капкашкыже эн шуко - 26 мечым - пуртенам! Тидлан футболын виш чемпионатыштыже Екатеринбург олан администрацийже ден Спорт федерацийже мыйым «Эн сай бомбардир» лӱм дене палемдышт. Чыла сеҥымашемым йӧратыме ешемлан, авам-ачамлан пӧлеклем - чоныштышт мыйын верч эре куан да кугешныме кумыл озаланыже.