Президентский состязанийыш логалаш - кугу пиал

3 гыч 24 сентябрь марте Анапа ола воктен верланыше «Смена» лагерьыште «Президентский состязаний» Всероссийский спорт таҥасымашын финал этапше эртыш. Тушко элнан 80 субъектше гыч 149 класс-команде - 74-ше ялысе, 75-ше оласе - шке вий-куатшым ончыкташ погынен ыле. Меат, Чорай марий гимназийын 10-шо классыштыже тунемше-влак, региональный этапыште чылам ончылтен, тиде таҥасымаште Пошкырт кундемын чапшым аралышна.

Эл кӱкшытан таҥасымашыш логалаш ме изирак класслаште тунемме годымак ямдылалташ тӱҥалынна, вет гимназий гыч финал таҥасымашке мемнан акана-изана-влакат ик гана веле огыл миеныт (Тений Чорай гимназийын командыже «Президентский состязанийын» финалышкыже кудымшо гана логалын. - ред.). Ямдылалтмына арам лийын огыл. Ялысе команда-влак коклаште спортивный многоборьеште кокымшо верым нална, а эстафетыште мемнан деч виян команда уке ыле. Чыла командым куржын эртышна да «чемпион» лӱмым сулен нална.

Тыгай кӱкшытан таҥасымашке шуаш мыланна туныктышына-влак Лариса Николаевна да Сергей Михайлович Мурзашевмыт полшен шогеныт, ӱдыр-рвезе-влакым кумылаҥден моштеныт. Нунылан пеш кугу таум каласыме шуэш. Тыгак мемнан ачана-авана-влак лӱм дене район, гимназий администраций-влаклан, спонсор-влак С.Ю. Васюткинлан, В.В. Андрияновлан, В.М. Андреевлан кугу таум каласена.

Таҥасымаш деч посна моло оҥай мероприятийлаштат участвоватлышна, экскурсий ден походлаш коштна. Яра жапыште Шем теҥыз воктенат каналтен шуктышна. Тушто эртарыме жапна ӱмыр мучкылан шарнаш кодеш.

гимназийын тунемшыже.

Мишкан район.