«Шӧртньӧ шыже» кроссым йӧратат

Чорай селасе марий гимназийыште кажне ийын «Шӧртньӧ шыже» кросс эртаралтеш. Тиде ийынат 12 сентябрьыште урок деч вара туныктышо ден тунемше-влак таҥасымашым эртарыме олыкыш кайышт. Мотор пӱртӱс, яндар юж, чевер кече - чылажат кумылым нӧлтен. Таҥасымашым эртараш туныктышо Л.Н. Иванова ден

Г. Мурзашевлан ӱшанен пуымо. Моло туныктышо-влакат кертмышт семын полшеныт.

Таҥасымаш - кажне йочалан кугу событий. Южо тунемше тудым куанен вуча, южыжо - лӱдынрак, туге гынат кажныже кертмыж семын кӱкшӧ результатым ончыкташ тырша. Ончыч тӱҥалтыш классыште тунемше-влак 300 метрыш куржыныт. 1-2 классыште тунемше рвезе-влак коклаште С. Изилянов эн тале лийын, ӱдыр-влак коклаште 1 верым З. Рогожникова ден Д. Изилянова пӧленыт. 3-4 классыште тунемше-влак коклаште И. Бурзумбаев ден В. Ибулаева ойыртемалтыныт.

Кокла класслаште тунемше-влак 500 метрыш куржыныт. Тыште 6 классыште тунемше Р. Попков ден Л. Мурзашева эн писын куржыныт. 7-8 класс тунемше-влак таҥасыме годым Д. Зайнакаев чылаштымат ятырлан ончылтен, но тидлан нигӧ ӧрын огыл, вет Дима шуко таҥасымаште гимназийын чапшым арален, сеҥышыш лектын. Ӱдыр-влак кокла гыч А. Гайнутдинова икымше верым налын.

9-11 класс тунемше-влак коклаште икымше верлан кучедалмаш тӱҥ шотышто 9 класс рвезе-влак коклаште лийын. Йолташыже-влакым ончылтен, К. Алиев ончыко лектын. Ӱдыр-влак коклаште А. Тимиркаева чолгалыкшым ончыктен.

Спорт пайрем чылалан куаным конден. Сеҥыше-влак мӧҥгышкышт Чап грамот ден медальым наҥгаеныт. А сеҥыдымыже лийынат огыл, вет чыланат шке дистанцийыштым куржыныт, финишыш шуыныт, жапым веселан эртареныт.

О. ИРКАБАЕВА, Я. Ялкайн лӱмеш марий гимназий.