Теният чорай-влак сеҥеныт

14-15 майыште Стерлитамак олаште элысе школьник-влак кокласе «Президентский состязаний» спорт таҥасымашын региональный этапше эртыш. Тушко Башкортостан Республикын 11 районжо гыч тале ӱдыр-рвезе-шамыч погыненыт ыле.

Тений спорт таҥасымаште жеребьевко почеш 9 классыште тунемше-влак вийым тергышт. Мишкан район гыч Чорай марий гимназийын тунемшыже-влак шкеныштым пеш талын ончыктышт: эстафетыштат, многоборьештат икымше верым нальыч. Чумыр иктешлымаш почеш региональный этапын чемпионжо лийыч. Тиде командылан «Президентский состязанийын» Всероссийский этапышкыже каяш йӧным пуа. Личный первенствыште Данила Иркабаев икымше, Данила Рыбаков кокымшо верым сеҥен нальыч.

Окса укелан кӧра тиде таҥасымашышке «Каяш але уке?» йодыш шоген. Но тиде йодышым решатлаш спонсор-влак А.П. Байназов, С.М. Миналтдинов, В. Андрианов, транспорт дене А. Шамшиев полшышт. Нунылан пеш кугу тау!

Л. МУРЗАШЕВА.