Шарнымаш ечыгорныш ӱжеш

Кульчубай ял воктенсе «Старт» спорт лагерьыште ече дене СССР спорт мастер Д.Т. Тимиркаевым шарныме лӱмеш таҥасымашым теният эртарышна. Шӱдӧ утла ечызе: школышто тунемше, спорт ветеран да тыгак ече дене куржталаш йӧратыше моло еҥ-влак - 7 мартыште классике йӧн дене таҥасаш лекте. Л.А. Байрамовын вуйлатыме судья-влак (П.А. Никитин, С.М. Мурзашев, Н.А. Зайнитдинов) нунылан ӱшаныме пашам сайын шуктышт. Валентина Янгуатован тыршымыжлан кӧра кажным пайрем кумыл авалтен, таҥасыме аланыште мурсем йоҥген, буфет пашам ыштен, а финишыште шокшо чай вучен, шашлык да кӱэштме кочкыш пушланеныт. Сеҥыше-влаклан медальым, Чап грамотым, шергакан пӧлекым да окса призым кучыктышна. Ветеран-влаклан лӱмын кечывал кочкышым ямдылыме ыле. Нуно Д.Т. Тимиркаевым порын шарналтышт, а йоча годсо йолташыже Е.А. Андрианов почеламутым лудын пуыш.

Таҥасымашым сай кӱкшытыштӧ эртараш полшышо-влаклан кугу таум каласыме шуэш. Тиде - спонсор-влак В. Байназов, Д. Ибраев, С. Яшпаева, Е. Андрианов, Е. Бурзумбаев, Денис Тимиркаевичын икшывыже-влак Виталий, Ольга, Александр, тыгак ДЮСШ-ан директоржо Н. Зайнитдинов да тренерже Л. Байрамов, районысо спорткомитет вуйлатыше Р. Ямаев, Тымбай ялсовет администраций вуйлатыше Д. Янгубаев, тракторист С. Сайранов. Ече спорт да тудын дене кылдалтше шарнымаш калыкыште тыгай кожмак еҥ-влаклан кӧра илат.

Р. ШАЙБАКОВ, «Старт» спорт лагерьын директоржо.

Снимкыште: Ечызе-влак стартыш лектыныт.