Йӱштӧ деч она лӱд

Теле - эн йӧратыме жапем. Чыла вере ош тӱс - мылам тиде арулык, яндарлык, мучашдыме порылык, ласкалык. Кеч йӱштӧ, поран, пургыж, писе мардеж лийже, садак телым сай. Кеҥежым паша шуко, а телым каналташ йӧн уло. Изи ньога-влак лум курыкышто юарлат гын, ме - ечыгорнышто. Ялна деч тораштат огыл чодыра, Киебак эҥерна, Кӧгӧрчен курык верланеныт. Чодыраш пурет, оҥ тич южым шӱлалтет - чыла удажым, осалжым, нойыметым мондет, пуйто шулдыраҥат! Эх, ечыже кузе мунчалта! Тений ечыгорнына, эҥерысе ий ӱмбач лектын, пӱнчер, кожер воктеч курыкышкыла шуйна. Тиде корным Чернобыльын ветеранже Владислав Баязитов почын. Лум ӱмбалне луй, мераҥ, рывыж, шордо кышам эскерена. Южгунам пеленна йоча-влакымат наҥгаена. Нуно пеш устан чошат, поктен шуашат ок лий. Нылымше классыште тунемше Максим, Антон, Роланд, Юлиана яндар южым, курыкым, ечым йӧратат. Кӧ пала, ала нуно тале спортсмен лийыт?

Н. АХМАДИЕВА.

Снимкыште: Чиен йолыш пӱсӧ ечым, чымена мардеж деч писын!