Все новости
Спорт
11 шорыкйол 2018, 12:10

Таза капыште - таза шӱлыш

Пытартыш жапыште шуко ялыште тӱрлӧ программе почеш кӱлешан пашам шуктен шогат: корным ачалат, школ пӧртым леведыт, йоча модмо площадкылам ыштылыт. Тыгай пашалан ял калык оксам пога, вара тушко кугыжаныш шке ужашыжым ешара. Ик тыгай программыже ППМИ - программа поддержки местных инициатив - маналтеш. Мемнан районышто тыгай программа почеш тений Корак ялыште обелискым почыч, Кемейыште пожарный ДПО-м ачаленыт, Токтарыште корным, Ардашыште водопроводым ыштеныт. Программыш кызыт районысо моло ял-влакат ушнаш тӱҥальыч. Монарыште илыше-влакат тыгай сай пашам тарваташ кутырен келшышт.

Тений Рособрнадзор мемнан школысо стадионышто чыла спортоборудованийым рончен налаш шӱден. Амалже - спортинвентарьын лицензийже уке, вес семын каласаш гын, чылажымат шке кид дене ыштыме. Тыге тунемше-влак нимо деч посна кодыч. Школыштына тунемше шуко: шкенан Монар ялысе йоча-влак, Корак да Андреевка ялла гыч икымше гыч латикымше класс марте тунемаш коштыт, школ ийготыш шудымо йоча-влакат улыт. Тыгак стадионыш, школышто урок-влак пытымеке, кугурак ийготан ӱдыр-рвезе-влак тренировкыш коштыт. Кеҥежым гын стадионна мӱкш омартала гӱжла: ола гыч толшо йоча - уныка-влак футболла модаш да куржталаш мият. Ача-ава да южо коча-кова-влакат йӧратыме верыш погынат. Калык тыште спортлан шӱман. Арамлан мо паралимпийский чемпион Кирилл Михайлов да Ростислав Павлов мемнан кундемеш шочын-кушкыныт. Тунемшына-влакат районышто, республика да Россий кӱкшытыштӧ эре сеҥышыш лектын шогат.

Оборудований укелан кӧра стадионна ынде чараҥын кодо. Тушко коштшо-влак шагалемаш тӱҥальыч. Тыгай ситуацийым тӧрлаш манын, школ директор Роман Ибакович Ибаев ял калык погынымашыште, ППМИ-шке ушнен, стадионлан спортивный оборудованийым налаш йодо. Тудо шкежат физкультурник улеш, садлан умыла: таза капыште - таза шӱлыш. Ял калык тудын йодмыж дене уло кумылын келшыш. Йоча-влак иктаж-мом удам ыштен коштмо олмеш спорт дене кылым кучышт - тыгай пунчалым луктыч иквереш да программыште участвоватлаш келшышт. Погынымашым ончыч школышто эртарышна, вес ганажым Монар клубышто чумыргышна. Районысо представитель-влакат толыныт ыле.

Ме чылан ӱшанен кодына: ик жап гыч мемнан школ стадионыштына у, сай да лицензиян оборудований лиеш, да ончычсо гаяк йоча, ача-ава да коча-кова-влак тушко уло кумылын кошташ тӱҥалыт. Арамлан огыл вет кажне еҥ эн ончыч тазалыкым тылана. А тазалыкым шуараш сай вер кӱлеш.

И. ЗАХАРОВА, Монар школын туныктышыжо.

Мишкан район.
Читайте нас в