Куржталаш лекмеке, сеҥыман!

Айгузиным шуко сеҥымашлан кӧра районышто веле огыл, республика мучко палат. Юрий Байгузинович - тале спортсмен, Дмитрий ден Эдуард эргыже-влакат спорт мастерыш кандидат улыт.

РФ-се общий образованийын почетный пашаеҥже, Башкортостан Республикысе физический культурын заслуженный пашаеҥже, куштылго атлетика да ече дене спорт мастерыш кандидат Ю. Айгузин шке икшывыже-влакым веле огыл, Кугу Соказа школышто тунемше-влакымат спортлан шӱмаҥден кушта. Тудын воспитанникше-влак Москвасе олимпийский резерв школышто тунемыт. Сеҥымашышт дене тренерыштым да районнам чапландарат. Айгузинмытын ешыште тӱрлӧ кӱкшытан сеҥымашлан налме 800 утла медаль, 30 кубок да эше ятыр Чап грамот, сувенир да пӧлек аралалтыт.

Тенийсе кеҥеж сеҥымашлан поснак поян лийын. Юрий Айгузин 23 апрельыште Сибай олаште полумарафонысо 10 километрыш куржмаште икымше лийын. Ик арня гыч Кугу Сеҥымашлан 72 ий темме вашеш Совет Союзын Геройжо Г. Овчинниковым шарныме лӱмеш эртарыме «Осиновка-Пӱрӧ» кроссышто икымше верым налын. 13 майыште Николо-Березовка селаште республикысе виш полумарафонышто кумшо толын.

27 майыште Салават олаште дуатлон дене Российын кубокшо верч таҥасымаште (Ончыч 1 километрым куржыныт, 8 километрым велосипед дене каеныт, вара эше 2 километрым куржыныт) Юрий Байгузинович икымше верым налын. 11 июньышто Нефтекамск олаште триатлон таҥасымаш годым супер-спринтыште (300 метрым иймаш, 8 километрым велосипед дене кайымаш, 2 километрым куржмаш) кокымшо результатым ончыктен.

«Икмыняр ужаш гыч шогышо таҥасымашлашке мый тений гына ушненам, - ойла тале марий. - Дуатлонышто спорт-

смен ондак куржеш, варажым велосипед дене кая да кумшо этапыште уэшын куржеш. Триатлонышто эше вӱдыштӧ таҥасыман. Супер-спринтыште утыждене тургыжланенам, сандене кокымшо верым веле налынам. 1 июльышто триатлон дене Уфаште эртыше республикысе виш таҥасымаште шканем сай результатым ончыкташ цельым шынденам да сеҥен кертынам».

Алексеевка поселкышко стартыш шӱдӧ утла спортсмен лектын. Ятыр спортсмен, финишыш шуде (нуно 750 метрым ийыныт, 20 километрым велосипед дене каеныт да 5 километрым куржыныт), таҥасымаш гыч лектын. Но Юрий Айгузин чыла чытен да икымше верым сеҥен налын. Благовещенск олаште эртыше полумарафонышто (21 километрат 0,97 метр) икымше верым налын. Екатеринбург олаште эртыше полумарафон кышкарыште 10 километрыш куржмаштат сеҥен. Тушеч толмекше, Юрий Байгузинович да Дмитрий эргыже триатлон дене БР-н чемпионатышкыже миеныт. Шке ийготан-влак коклаште коктынат икымше верым налыныт. Нижнекамск олаште кросс-кантри триатлонышто (750 метрым иймаш, 20 километрым велосипед дене кайымаш, 5 километрым куржмаш) Ю. Айгузин кокымшо лийын.

Воткинск олаште триатлон дене Всероссийский таҥасымаш эртен. Тудо 1500 метрым иймаш, 40 километрым велосипед дене кайымаш да 10 километрым куржмаш гыч шоген. Мемнан спортсменна тиде дистанцийым 2 шагатат 41 минутышто эртен да кокымшо верым налын. У тунемме идалык тӱҥалтыште Ю. Айгузин Пермь олаште эртыше тӱнямбал полумарафонышто (21,1 километр) куржын да шке таҥашыже-влак коклаште финишыш кокымшо толын. 9 сентябрьыште Янаул олаште республиканский виш таҥасымаште 12 километран кроссышто икымше верым налын. 17 сентябрьыште Уфа олаште тӱнямбал марафон кышкарыште 10 километрыш куржмаште шке таҥашыже-влак коклаштат икымше лийын. Тиде таҥасымаште Кульчубай ялын шочшыжо, Олимпийский модмаш-влакын участникышт Григорий Андреев абсолютный чемпион лийын.

Но Юрий Айгузин тидын дене серлагаш ок шоно. Сентябрь мучаште - октябрь тӱҥалтыште Адлер олашке куштылго атлетика дене ветеран-влак коклаште эртарыме Российын виш чемпионатышкыже кайынеже. Ме Юрий Байгузиновичлан тушечат сеҥен пӧртылаш тыланена.

Е. МАТВЕЕВА.

Снимкыште: Ю. Айгузин (шолаште) таҥасыме годым.

Еш архив гыч налме фото.