Марий рвезе - тӱнямбал пьедесталыште

Нефтекамскысе нефтяной колледжыште тунеммыж годым Максимлан йӧршын вучыдымын ятыр годсек армрестлинг секцийыште заниматлыше ик студент дене вийым терген ончаш темленыт. Нигӧат сеҥен кертдыме рвезын кидшым (Садак сеҥа манын, шукынжо тудын дене кидвийым тергаш тоштынат огытыл.) икымше ганаштак темдал кертмыжлан Максим шкежат ӱшанен огыл. А сеҥалтше йолташыже Максимым спортзалыш армрестлингым вӱдышӧ тренерже деке наҥгаен.

Тыге 19 ияшрак рвезе, кум ий наре армрестлинг дене заниматлен (Идалыкат пеле армийыште служитлымыжым шотыш налаш огыл гын.), Российын, Европын чемпионжо марте кушкын, 2013 ийыште Тӱнямбал чемпионат гыч ший медаль дене пӧртылын, эше профессионал-влак коклаште эртарыме таҥасымаште Тӱнямбал кубокым сеҥен налын. 2016 ийысе Тўнямбал чемпионатыште кумшо верыш лектын.

Тений армрестлинг дене Тӱнямбал чемпионат 2-11 сентябрьыште Будапештыште эртен. Максим туштат ший медальым сеҥен налын, тиде тудын тӱнямбал кӱкшытан нылымше наградыже. Башкортостан гыч армрестлинг дене тӱнямбал кӱкшытан спорт мастер тымарте Максим шкетын веле ыле, а Будапешт деч вара тудлан «Россий спортын заслуженный мастерже» лӱмым пуэныт.

Венгрийысе чемпионатын предварительный таҥасымаштыже М. Яндубаев Италийын, Чехийын, Молдовын, Казахстанын спортсменышт, Россий гыч Олег Черкасов дене вийжым терген да чылаштым сеҥен. Финалыштат куд гана тӱнямбал чемпион, спортын заслуженный мастерже О. Черкасов дене вашлияш логалын. Ты гана Максимын кынервуйжо изишак тарванымылан кӧра чемпион лӱмым О. Черкасовлан пуэныт.

Но марий рвезе чакнаш ок шоно. «Тўнямбал чемпион лийме марте ала-кузе ик-кок ошкыл веле ок сите, садлан, сеҥымашке шумеш, умбакыжат кучедалаш тӱҥалам», - манеш.

Краснокам районышто шочын-кушшо Максим Яндубаев кызыт Октябрьский олаште ила да пашам ышта.