Матайым ужалаш ок лий

Тошто Яшыште Апай кугызан ныл ӱдыржӧ ыле. Иктыжым, Матай кокайым, мыят шарнем. Куштылго кап-кылан, пашаче, шаяраш йӧратыше ыле. Ешыже лийын огыл. Школыш пелыч пашам ышташ толшо туныктышо ӱдыр-влакым эре туддек пачерлан пуртеныт.

Ожно Янаул район Кызыл Яр гыч ик татар павай Яшыш мотоциклым ужалышым кычал толын. Палымыже Темырай павай дек пурен.

- Эргымлан матай кӱлеш ыле, ала тыште иктаж ужалыше уло? - йодын тудо.

Шаяраш йӧратыше Темырай павай, шуко шоныде, каласен шынден:

- Уло, Апай кугыза дек кай, тудын Матайже уло.

Татар-влак мотоциклым «матай» маныт. Саде павает Апай кугыза дек миен пуренат, татарла йодын:

- Мылам матай кӱлеш ыле. От ужале дыр?

Апай кугызат аптыранен, вара удыл-удыл умылтараш тӱҥалын:

- Кузе мый Матайым (ӱдыржым йодыт манын шоненыс) ужалем лиеш. Шкаланнат кӱлеш. Ынде мый шоҥго улам, виемат пеш уке. Кожлашке пу ямдылашат Матай дене коштына, вольыкымат тудо онча, вӱдланат коштеш, сурт кокласе моло сомылат тудын вачӱмбалне. Туддеч посна ме иленжат огына керт.

Толшо павает умшам карен колыштешат, ӧрын йодеш:

- Кеч матаетым ончыкто, могайрак вара тудо?

Апай павай, кудывечыш лектын, Матай ӱдыржым кычкыралеш. Ӱдыржӧ пӧртыш пурен шогалешат, павай татарлан «Теве мемнан Матайна» манеш.

Татар павай Темырай павайын мыскарам ыштымыжым тунам веле умыла.

А. АРТАМОНОВА.

Братовщина ял,

Калтаса район.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».