Кӱтӱчым «пукшеныт»

Яндук кугыза ялысе вакшыште пашам ышта. Йӱдвошт погынышо вӱд дене шурным йоҥыштенат, кечывал кочкышлан суртышкыжо каен. Кечывал деч вара пашаш кайымыж годым пӱя воктене Уналчым вашлиеш.

- Э-э-э, Уналче шешке, кушко тыге вашкет?

- Темыр деке кӱтӱш. Кутлия Сендра курык деке кечывал кочкышым намияш кӱштыш.

- Ой-ой, Темырбайым таче пеш чот пукшеда, кызыт гына суртем гыч лекмем годым уремыште Амалчым вашлийым, тудат Темырбайлан кочкышым намиен.

Уналче, Амалчын лӱмжым колмеке (Ончыч Темырбай дене келшеныт улмаш.), моткоч шыдешка.

- Шорык-влак дене пырля шудым кочшо, - манешат, мӧҥгеш савырнен ошкылеш. Темырбай, кечыгут ялышкыла ончен, кас марте памаш вӱдым гына йӱын, кӱтӱм кӱта.

Кастене ялыш кӱтӱм кондымеке, шужен пытыше Темырбай суртышкыжо шыдешкен толын пура. Ужеш, пӧртыштат юж «электризоватлалтын». Ватыже огешат мутлане, марийжым шыдын-шыдын ончал колта, сумкажымат ястарен огыл, омса воктенсе теҥгылеш вераҥден. Темырбай, нимом умылыде, иканаште кечывал ден кас кочкышым ыштен, малаш возеш.

Эрдене ик вакшыш гыч пырля кынелмышт годым ватыже марийжым чоян ончалешат, шыргыжалын пелешта:

- Яндук кугызалан ӱшанет гын, илышым ала-кушкат шукта!

Е. АПТУКОВ.

Ӱлыл Такия ял, Краснокам район.