1 апрель - Воштылчык кече

Ӧпкелен

Нине кок рвезе ик ялыште шочын-кушкыныт, ик школышто пырля тунемыныт, ик классыште парт коклаште йыгыре шинченыт. Кеҥежым каныш жапыште ачаштлан ял вольыкым кӱташ полшеныт. Икманаш, ешыштлан ӱшанле эҥертыш лийыныт. Рвезе-влаклан кужу кеҥеж кечыжымат, пелтыше кече шокшымат, йӱран игечымат, молымат чыташ логалын.

Школым пытарымек, иктыже СПТУ-што кумда профилян механизаторлан тунем лектын, весыжлан шӱеш галстук пидын коштман пашам шукташ пӱрен улмаш. Коктынат, ешаҥын, шочмо ял деч ӧрдыжтӧ иленыт.

Икмыняр ий эртымек, ик пайрем кечын ожсо йолташ-влак шочмо ялыштышт вашлийыныт. «Ме тый денет ожно солам шӱдырен коштынак мӱшкырнам темышна», - пелештен механизатор лийшет, интеллигент сынан йолташыжым ӧндалшыла. Весыже тыге саламлыше пӧръеҥым шкеж деч шӱкалын да, мушкындыж дене перен, йол ӱмбач йӧрыктен.

Молан южо еҥын ожсым шарналташ чытышыжат, патырлыкшат ок сите гын?

Йылмым тораштырак кучыман

Ялыште илыше-влак сайын палат, чоҥымо пашам тарватыме годым чӱчкыдын лесничествыш коштман, кӧлан дыр вуйым савыман. Ик пӧръеҥ лесничество пеленсе цех мастер дек икмыняр тумым йодын миен. Тудыжо, Юмылан тау, палемдыме кечын каласыме квартал ден делянкыш мияш шӱден. Икмыняр кече деч вара пашам «кӱктымеке», тиде пӧръеҥ чодыра озалан, иктаж вере шинчын, пеленже намийыме кочкыш-йӱышым авызлаш темлен.

Чодыра гыч лектын, ужар шаршудеш верланен гына шуктеныт, корно дене толшо изи тракторым ужыныт. Кабиныштыже кок еҥ шинчен. Нунет, тракторым чарен, коктынат кабин гыч тӧрштен воленыт да шаршудышто шинчыше еҥ-влак дек лишемыныт. «Теве ме, лесник-влак, пушеҥге росотам шындена, вара тудым йӧсланен куштена, сӧрал чодыраш савырена, а тый тиде поянлыкым ужалет», - манын иктыже мастерлан.

Икмыняр ий гыч туге толын лекте - цех мастерым лесничий ыштен шындышт. Тудо ты пашаш тӱҥалме кечынак саде «йылман» кок лесникым паша гыч шуренат лукто. «Шоналтыде ыштыме пашатым да поснак йылметым вуйысо шонымашет деч тораштырак кучаш тырше», - манын эше кокла курымыштак лӱмлӧ англичан драматург Уильям Шекспир.

А. АСМАЕВ.