Шыже пӱртӱс пеш сӧрал

Адак у тунемме идалык тӱҥале. Тунемше-влакым пеш шуко оҥай урок, пайрем, путешествий, модыш да конкурс-влак вучат. А кузе нуно экскурсийыш кошташ йӧратат!

Ик шыже кечын меат, Лепешкан тӱҥалтыш школын туныктышыжо да тунемшыже-влак, чодырашке экскурсий дене мийышна. Сай игече годым шыже чодыра пеш сӧралын коеш. Пушеҥге-влак ужар, йошкар, нарынче лышташлам шоҥал шогалыныт. Юж яндар, шӱлаш ласка. Ме пӱртӱсын моторлыкшым гына огыл, шыжымсе вашталтыш-влакымат эскерышна.

Чодыра шке илышыж дене ила. Теве мӱндырнырак шиште перкалыме йӱкым колна. Укш гыч укшыш ур тӧрштылеш, телылан кочкышым ямдыла. А вондер йымалне шоҥшо койылалтыш. Очыни, телылан малаш верым ямдыла ыле. Мемнан лишеммынам шижын, мундырала пӱтыралт возо. Теве кайык-влак тӱшка дене ик пушеҥге гыч весышке рӱж-ж чоҥештен кайышт.

Ме икшыве-влак дене тӱрлӧ лышташым, пӱгыльмым, нӧшмым погышна. Нуно мыланна шыже поделкым ыштыме годым кӱлеш лийыт. Эн сайжым школысо выставкыште ончыктена.

Эше ме нунын дене пӱртӱсым, пушеҥге ден вондерлам, чодыраште илыше чыла чонаным аралаш кӱлмӧ нерген мутланышна. Йоча-влакым тидлан изинек туныктыман. Йыр вер-шӧрым тӱзаташ манын, школ кудывечыште пушеҥгым шындаш кутырен келшышна. Тиде ой чылалан келшыш. Куаныше да весела чуриян мӧҥгӧ пӧртылна.

Теат пушеҥгым шындыза! Тек тудо тендан дене пырля кушкеш.