Шыже вашлиймашлан поян ыле

Эн ондак сулло туныктышо да кидпаша мастар М.П. Кутлусатов дене вашлиймашым эртарышна. Тунемше-влак тудым сылне почеламут да муро дене саламлышт. Вашлиймаште Михаил Павлович шкеж нергенат каласкалыш. Рушарнян эрдене Пӱрӧ район Кужнур ял гыч тудо яра кид дене огыл, пӧлек дене тольо. Михаил Павлович школлан тӱмырым пӧлеклыш, сай тыланымашым ойлыш. Тудо Уфа олаште марий йылмым да литературым тунеммылан, шочмо калыкын историйжым, йӱлажым шымлымылан, марла кушташ-мураш тунеммылан моткоч куанен ыле. Михаил Кутлусатовлан Рушарня марий школ директорын алмаштышыже

В.В. Ганеева, тауштен, шарнаш кодшо пӧлекым кучыктыш. Тиде пайремыш эше вес уна - Л.С. Фатыхова, «Ош Виче сем» фольклор да этнографий ансамбльын вуйлатышыже, - толын ыле. Лира Сахибовна чыла унам пайрем дене саламлыш да тунемше-влаклан ансамбльже дене «Ӱдырым чиктымаш» куштымашым ончыктыш. Ансамбльын куштымыжо-мурымыжо уло залын кумылжым нӧлтале.

Вес пайремже «Шӧртньӧ шыже» ыле. Конкурс да модмаш дене пойдарыме пайрем йоча-влаклан поснак келшыш. Школын залжым шыже тӱс дене сӧрастарышна: ӱстембалне поян пакчасаска выставкым вераҥдышна, йырым-йыр лышташ-влакым пижыктышна… Пайремым йоча-влак шыже нерген сылне почеламут корныла дене тӱҥальыч, вара Шыже озам ӱжыч. Тунемше-влак «Лышташ» да «Поҥго» кок командылан пайлалтыч. Шыже оза Л.И. Салеева дене коктын тӱрлӧ конкурсым да викториным эртарышна. Йоча-влаклан шыже лышташ гыч аршашым чумыраш, поҥго тӱшкам ойыраш, шыже вургемым писын чиен шогалаш, шыжын поянлыкшым кычалаш да палаш, мутым марлаш кусараш поснак келшыш. Жюрин пашажым кугурак тунемше-влак В. Имаев ден А. Уразбаева шуктышт. Шыже оза чылам кугу корзиҥга дене кондымо олма дене сийлыш.

Эше октябрьыште Уфа олаште «У шӱлыш» район конкурс эртыш. Тушто Рушарня марий школышто 3 группышто тунемше Г. Мадиярова усталыкшым ончыктыш да ончыл верым нале. Гита ава, Шочмо Эл нерген да Мустай Каримын почеламутшым каласкалыш. Гита эше «Республикем моктен мурем!» сочинений конкурсышто вийжым тергыш да сай лектышым ончыктыш.

Вашке Аван кечыже лӱмеш пайремым эртарена. Кумылда уло гын, 25 ноябрьыште 12 шагатлан чыладамат пайремыш ӱжына.