Кузе Башкортостаныште туныктышылан полшат

«ЧОЛМАН» ГАЗЕТЫМ МАX-ЫШТЕ ЛУДЫНА!

Туныктышо-влаклан медаль. Образованийыште ойыртемалтше сай лектышыш шумылан «За педагогическую деятельность» медальым кучыкташ тӱҥалыт. Указыште Просвещений министерствылан туныктышо-влаклан профессиональный мастарлыкыштым шуараш, электрон образовательный ресурс-влак (цифровой библиотека, методичка) дене тугок пайдаланаш йӧным ышташ, самырык специалист пелен эн шагалже ик ийлан кугу опытан наставникым пеҥгыдемдаш, тыгак пашам эшеат сайын шукташ таратыше мерым ямдылаш шӱдымӧ. 

Туныктышо-влакын тылзылан эн шагалже ик гана кугыжаныш музейлаш тугок мияш правашт лиеш. А верысе администрацийлаште педагог-влакын икшывыштлан йочасадыш верым черет деч посна пуышаш улыт. 

Виян туныктышо - виян тунемше. Регионышто туныктышо-влаклан пуымо полышын лектышыже шижалтеш. Мутлан, Башкортостан тунемше-влакын Всероссийский олимпиадышт шотышто Российын вич ончыл регионжо радамыш пурен. Йочана-влак тӱнямбал таҥасымашлаштат сай шинчымашым ончыктат. Тиде кечылаште Радий Хабиров Стерлитамак оласе 3-шо лицей-интернатын тунемшыже Руслан Аминовлан Башкортостан Вуйлыкын Таумутан серышыжым кучыктен. Рвезе июльышто Китайыште экономика дене IEO-2026 IX Тӱнямбал олимпиадыште ший призер лийын. 

Тений единый кугыжаныш экзаменын лектышыжат куандарыше. Республикыште тудым 210 ӱдыр-рвезе 100 баллан сдатлен. 2025 ийыште тыгай тунемшын чотшо 159, 2023 ийыште 82 лийын. «11 еҥ мультибалльник лийын - кок гана шӱдӧ баллым поген. Тений физикым, профильный математикым, биологийым, литературым, обществознанийым да англичан, руш йылмылам 100 баллан сдатлыше-влакын чотышт ешаралтын», - каласен просвещений министр Ильдар Мавлетбердин. 

Сайын тунемшым кумылаҥдымаш. Тунеммаште сай лектышым ончыктышо йочам ямдылыше кажне туныктышым кумылаҥдыше окса дене палемдат. Всероссийский олимпиадын иктешлыше йыжыҥыштыже сеҥышым ямдылымылан туныктышылан 300 тӱжем теҥгем, призерым куштымылан 150 тӱжем теҥгем тӱлат. 

Руш, башкир, шочмо йылме-влакым эн сайын туныктышо-влаклан кажне ийын 50 тӱжем теҥге премийым пуат. «Башкир йылмым да литературым туныктышо» регион-влак кокласе, «Башкортостанын идалыкын туныктышыжо» республикысе, тудын кышкарыште эртарыме «Идалыкын руш йылмым да литературым туныктышыжо», «Татар йылмым да литературым туныктышо», «Идалыкын самырык туныктышыжо» конкурс-влакын сеҥышыштым да финалистыштым 30 гыч 50 тӱжем теҥге марте премий дене суапландарат. Профессийыште кӱкшӧ лектышыш шушо, мастарлык дене ойыртемалтше республикысе эн сай туныктышо-влаклан 200 тӱжем теҥге, ЕГЭ-ште 100 баллым погышо выпускникым ямдылыше педагог-влаклан 50 тӱжем теҥге оксам тӱлат. Республикыште тыгак селасе школ-влакын директорышт да селаште пашам ыштыше туныктышо-влаклан грант оксам пуат. Тудын кугытшо 690 тӱжем теҥгеш шуэш. 

Пырдыжат тунемаш полша. Школ-влакым чоҥымо да капитально ачалыме шотышто Башкирий элыште ончыл радамыште улеш. Республикыште вич ийыште 217 зданийым капитально ачаленыт, тений эше 42 школым уэмдат. Ачалыме паша дене пырля школ-влакым кызытсе жапым йодмашыжлан келшен толшо оборудований - интерактивный доска, панель, ноутбук - дене йӧнештарымаш туныктышо-влаклан оҥай урок-влакым эртараш, тидлан тӱрлӧ цифровой ресурсым кучылташ йӧным ышта. Тыгай школлаште тунемаш да пашам ышташ эшеат оҥайрак. 

Радий Хабиров, Башкортостан Республикын Вуйлыкшо: «Образований системым вияҥдымаш мыланна национальный идей улеш. Мемнан йочана-влакын илыме кызытсе конкурент шӱлышан тӱняште, тиде пашалан кӱлеш тӱткышым ойыраш огына тӱҥал гын, ятырлан почеш кодына. Кушкын толшо тукымлан ме уло шӱм-чоннам, шинчымашнам пуышаш улына. Башкортостаным ончыкыжым нунылан вияҥдыман».

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!