Кузе республика у тунемме ийлан ямдылалтеш

«ЧОЛМАН» ГАЗЕТЫМ МАX-ЫШТЕ ЛУДЫНА!

Кызыт капитально ачалыме федеральный программа почеш республикыште 42 школым уэмдат, тушеч 36-шо 1 сентябрьыште йоча-влакым вашлияш ямде лийыт. Чоҥымо отрасльын пашаеҥже-влак нунын йырысе вер-шӧрымат тӱзландарат. Тиде сомыллан республикын бюджетше гыч 158 миллион теҥге оксам ойыреныт, верласе бюджет-влакын шийвундыштымат кучылтыт. 

Математика лицей. Уфаште математика лицей-интернатым чоҥымо пашам умбакыже шуят. Тудым шушаш идалыкыште сентябрьыште почаш шонат. Тушко тунемаш республика мучко эн талантан йоча-влакым чумырат. Башкортостан Вуйлык Радий Хабиров чоҥымо пашам писынрак шукташ, йоча-влакым лицейыш тений сентябрь гычак погаш тӱҥалаш да педколлективым ямдылаш шӱден. Тунемаш пураш шонышо-влакым конкурс почеш налыт.

Лӱдыкшыдымылыкым пеҥгыдемдат. 1 сентябрь гыч республикысе школлаште лӱдыкшыдымылык шотышто у системым шыҥдарат. Кажне тунемме учрежденийыште директорын алмаштышыже кӱкшытан лӱдыкшыдымылык йодышлан вуйын шогышо пашаеҥ лиеш. Регионышто тыгак школласе ситуацийым анализироватлыше да туныктышо-влаклан йоча-влак дене пашам ышташ полшышо психолог-влакын мобильный группыштым ыштат. Орол пашам шукташ «кова-влак» олмеш квалификациян специалист-влакым налашлан охранник-влаклан тарифный ставкым кум гана кугемдаш шонат.

Школыш погынымо годым оксам кузе аныклаш? Школыш кайыше йоча-влакын ешыштыштат 1 сентябрьлан ямдылалтыт. «Чек Индексын» (элысе калыкын налме сатужым да кевытысе ак-влакым шымлыше рӱдер) увертарымыж почеш, тений йочалан налме кӱлешан сату набор ава-ача-влаклан кодшийсе деч 6 процентлан шергырак лектеш да 18,9 тӱжем теҥгеш шуэш.

- Школлан сатум мый ятыр ий сентябрь кыдалне налам, - ойла Уфаште илыше Олеся Вильданова. - Тиде жаплан кевытлаште вургемлан да сатулан скидка кугу лиеш. 

Вес ийын икымше сентябрь деч ончыч шуко оксам пытарыдымашын, икмыняр тувырым да костюмым кугуракым налаш лиеш. Размер дене келшен ок тол гын, вургемым тугай ак денак але шергынракат увертарымаш сайтыште куштылгын ужалаш лиеш. Алмаштен чийыме сай йолчиемым налаш оксам аныклыме ок кӱл: школышто йоча кечеш кандаш шагат наре жапым эртара, арамлан огыл кызыт ятыр тунемше кроссовкыш куснен. Скидка дене ужалыме йолчиемымат муаш лиеш: кызыт кеҥежымсе йолчиемым вашкерак ужалаш манын, шулдынрак пуымо йӧным кучылтыт. Нуно «шӱлат» да пӧлемыште чияш лач келшен толыт. 

Теве шуко икшыван ава Дилара Максютова деч каҥаш:

- Школыш ме идалык мучко погынена. Августышто вигак кугу оксам луктын пыштыме деч тыге йӧнанрак. Майыште канцелярийлан «ревизийым» эртарем, мо кодмым ончем, ак-влак шулдырак улмо годым кеҥежым мом налшашым рашемдем. Вес семынже, роскот нерген ончылгоч шонкалыман да тудым икшырымын шеледыман. 

Могай льгота уло? Шуко икшыван еш-влак, кудыжын кажне икшывылан кокла парышыже илен лекташ ситыше окса деч кугу огыл, кок ийлан ик гана школ формылан компенсацийым налын кертыт. Ешыште икымше классыш кайыше йоча уло гын, тудлан школышто кучылтмо сату наборым (ранец, тетрадь, ручка, карандаш да молат) тугок пуат. 2027 ий 1 январь гыч нине кок полышлан йодмашым Госуслуги портал гоч пуаш лиеш. Шуко икшыван еш гыч йоча-влакын тыгак общественный транспорт дене тугок кошташ да школышто тугок кочкаш правашт уло. СВО-н сарзыже-влакын икшывыштынат тыгаяк льготышт уло, эше продленкылан, кружоклан тӱлымӧ аклан компенсацийым, йоча лагерьлаш да республикысе санаторийлаш каяш путёвкым пуат. 

Радий Хабиров, Башкортостан Республика Вуйлык: «Образований - мыланна поснак азапланыме йодыш. Икшывына-влаклан, кеч тора ялысе школышто, кеч оласе микрорайонлаште - качественный тунеммашлан да воспитанийлан чыла йӧным ыштыман». 

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!