+16 °С
Облачно
Шинчымаш кугорнышто
15 Июля , 07:15
Витле ий гыч вашлиймаш
Благовещенск педучилищын марий пӧлкажым тунем пытарымыланна тений 50 ий лие. Тунам ме, 21 ӱдыр да 13 рвезе, ныл ий тунемын, тӱҥалтыш классын туныктышыжо дипломым налын, кумда элна мучко шаланышна. Шукынжо илышнам туныктымо, йочасадыште изи икшыве-влакым ончен куштымо, воспитатлыме паша дене кылдышна. Кӱкшӧ лӱмым нумалше да шуко Чап грамот дене палемдыме йолташна-влак дене поснак чот кугешнена.
1-ше радам (шола гыч пурлашке): Самниева Марина, Тимирбаева Надежда, Калитова Дарья; 2-шо радам: Яваева Маргарита, Миляева Анна, Кутлуметова Мария, Валитова Лидия, Павлова Антонида, Шуматбаева Лидия; шеҥгелне: Валиахметова Маргарита, Шамыкаев Валерий, Ябаева Нина, Илимбаева Евдокия, Матвеева Наталья, Минилбаев Вячеслав, Ипаева Людмила. Авторын колтымо фото.
«ЧОЛМАН» ГАЗЕТЫМ МАX-ЫШТЕ ЛУДЫНА!
Тиде лӱмгече вашеш 24 июньышто ме, чалемаш тӱҥалше 16 выпускник, Благовещенск педучилищыш погынышна.
Ныл ий илышна дене кылдалтше ола моткоч чот моторланен да уэмын. Кажне эр-кас тошкен коштмо Советский уремнам йолын коштмо да каныме верыш савыреныт. Чыла вере ару, йол йымалне мотор плиткым шарыме, шинчын каналташ сӧрал пу олмо-влакым йӧнештарыме. Тунемме пӧртын оралтыштыже верланыше, ош кӱ дене ыштыме кок пачашан тӱшкагудынам йошкар кермыч дене сӧрастарыме храмыш савыреныт. Туныктышо-влакын илыме пу пӧрт-влак олмышто тачысе кечылан келшыше тӱрлӧ зданий-влак койыт.
Ончычсо педучилищын кӱкшӧ, неле парадный омсаж олмеш куштылго ош пластик гыч ыштыме омсам шӱм вургыжын шӱкална. Зданий кӧргыштӧ ремонт мия, нимогай тунемме пӧлем уке. Мыланна икымше пачашыште погынаш верым пуышт. Кокымшо пачашыште верланыше «шочмо» физика кабинетнам ышна уж, шергакан туныктышына-влак денат ышна вашлий.
Но мыланна тӱҥжӧ - икте-весе дене вашлиймаш, тунемме жапым шарналтымаш. Мир уремыште верланыше кафеште посна пӧлемым айлен, ныл шагат наре мутланен шинчышна. Илыш гыч кайыше пагалыме класс «ачана» М.М. Мадияровым да 6 йолташнам порын шарналтышна. Пеленна налме тунемме годсо фотографий-влакым ончен, тӱрлӧ оҥайым шарналтен, студент годсо мурына-влакым муралтен шинчымылан мо шуэш!
Тыге ме, вачӱмбачна 50 ийым кудалтен, уэш самырык жапыш пӧртылна. Икте-весе деч ойырлаш йӧсӧ ыле, но, пӱрен гын, Туныктышын кечыж годым уэш вашлияш кутырен келшышна.
