+21 °С
Облачно
Шинчымаш кугорнышто
26 Мая , 08:29
Чеверын, тӱҥалтыш школ!
22 майыште Кужнур школын нылымше классыштыже тунемше-влаклан да нунын ача-аваштлан посна школ йыҥгыр йоҥгалте - урокыш огыл, илышыштышт у йыжыҥыш.
Снимкыште: Чеверласыме тат изишак шӱлыкан. Авторын фотожо-влак.
Шукерте огыл гына ӱдыр-рвезе-влак икымше гана школ лондемым вонченыт, туныктышо-влак дене палыме лийыныт, икымше мутым возаш да вашешташ тунемыныт. Тыге ныл ият шеҥгелан кодын: икымше сеҥымаш-влак, йӧратыме класс, келшымаш...
«Тӱҥалтыш школ дене чеверласымаш» пайремыште муро ден почеламут-влакым йоҥгалтарышт, школ илыш гыч сценкым да концерт номерым ончыктышт. Кажне выступленийыште нунын кушкын шумышт, чолгарак, ӱшанлырак, кугурак лиймышт шижалте.
Тиде кече куанле да тыгодымак изиш шӱлыканрак лиймыла чучо, молан манаш гын у ошкылым ыштыме гынат, тиде ийлаште эре пеленышт лийше туныктышо-влак дене чеверласаш жап шуын.
Тӱҥалтыш школым тунем пытарыше шерге тунемше-влак, умбакыже тендам у предмет, уым пален налмаш да сеҥымаш-влак вучат. Тек тендан чылажат шотлан толеш, ончылныда эре у корно почылтеш!