+7 °С
Облачно
Шинчымаш кугорнышто
9 Апреля , 05:06
Шочмо йылмым туныктышо-влак таҥасеныт
Республикыште ий еда «Башкортостанын идалыкын туныктышыжо» мастарлык конкурсым эртарат. Пытартыш ийлаште шочмо йылмым туныктышо-влак коклаштат эн сай пашаеҥ-влакым ойырат. Март мучаште «Идалыкын шочмо йылмым да литературым туныктышыжо» мастарлык конкурсым иктешленыт.
Конкурсышто призовой верыш лекше, тыгак лауреат лийше шочмо йылмым туныктышо-влак. Т.Г. Аптулаева - шола гыч нылымше. БР Образований министерствын сайтше гыч налме фото.
Образований министерствын увертарымыж почеш, республикысе конкурсышто тӱрлӧ районла ден олалаште шочмо руш, башкир, татар, чуваш, марий йылмылам туныктышо 20 еҥ усталыкшым ончыктен. «Урок», «Тунемше-влак дене мутланымаш», «Мастер-класс», «Педагогический ситуаций», «Министр дене мутланымаш» йыжыҥлаште нуно пашаштышт у технологий-влакым, инноваций йӧным моштен кучылтмыштым ончыктеныт, оҥай урок-влакым эртареныт, туныктымо пашаште вашлиялтше тӱрлӧ ситуацийыште шкем кучен моштымышт дене палдареныт.
«Идалыкын шочмо йылмым да литературым туныктышыжо» республикысе конкурсышто тений Дӧртыльӧ район Чарлак школышто марий йылмым да литературым туныктышо Т.Г. Аптулаева сеҥышыш лектын. Татьяна Григорьевна образований аланыште чумыржо латвич ий утла пашам ышта. Тудо Благовещенск педагогика колледжын да Бирск социально-педагогический академийын филологий факультетшын выпускницыже улеш. Кызыт визымше-индешымше класслаште тунемше ӱдыр-рвезе-влакым шочмо йылмылан да литературлан шӱмаҥда. Уста туныктышым шокшын саламлена да ончыкыжат у сеҥымашыш шуаш тыланена.
Новости партнеров
