Шочмо йылме - калыкын поянлыкше

Шочмо йылме - тиде кугу поянлык. Кажне калык тудын дене кугешнышаш. 21 февральыште тӱня мучко эртарыме Шочмо йылмын кечыже айдемылан тудым аклаш кӱлмӧ нерген ушештара. Л.И. Митаева самырык-влак дене марий йылмынам арален кодымо шотышто тургыжландарыше йодыш-влакым лончылыш, историйнам, йӱланам, тӱвыранам палаш, шымлаш кӱлмӧ нерген ойлыш. Библиотека пашаеҥ-влак ӱдыр-рвезе-влакым тиде кечын историйже, тӱняште тӱрлӧ йылме улмо дене палдарышт, шочмо йылмым молан тунемаш кӱлмӧ нерген мутланышт, тыгак йылмым шымлыше землякна-влак В.М. Васильевым, Ю.В. Андугановым, нунын шочмо йылме нерген ушан ойыштым шарналтышт. 

Вашлиймаш «Марий йылмым палет мо?» уш-акыл пӱсылыкым тергыше модмаш дене мучашлалте. Тыште йоча-влак тӱрлӧ заданийыште шочмо йылмым сайын палымыштым ончыктышт. Чолга тунемше-влак коклаште поснак Н. Ульяновам, Н. Кунакбаевам, Д. Ванюшкинам, К. Изибаевам, Р. Хантимировым палемдыман. А эше тиде кечын йоча-влак марий литературлан негызым пыштыше Сергей Чавайнын почеламутшо-влакым сылнын йоҥгалтарышт...