21 февраль - Шочмо йылмын тӱнямбал кечыже

Тыныш Осыпын сугыньжым да эрвелмарийын ойöрыжым шарнен, тÿрлö йöным кучылтын, Арлан школышто йоча-влакым шочмо йылмылан шӱмаҥден куштена. Шочмо йылме айдемым илаш туныкта, ушыжым волгалтара, чонжым пойдара, тÿнян сылнылыкшым умылаш полша. Шочмо йылмын илыш кÿлешлыкше мучашдыме. Арамлан огыл тудым чевер кече дене таҥастарат.

Ий еда рÿжге шочмо йылме арням эртарена. Тиде арнянат школышто эре марий муро, почеламут йоҥгат. Лÿмлö кече-влаклан пöлеклыме тÿрлö мероприятийым: «Марий кандыра» флешмобым, «Шочмо йылме - ава йылме» литературно-музыкальный композицийым, «Ковамын шондыкшо» ойпого шагатым, «Марий тÿрыштӧ - марий тиште» мастер-классым да молым - эртарена. Тыгай паша йоча-влакым, нунын ача-аваштым марий йылмым, калыкын тӱвыражым пагалаш тарата. Школыштына марий йылмылан тунемше-влакым Л.И. Митаева, О.А. Шагиева, Н.Ю. Сайпушева шӱмаҥдат.

Марий йылме калыкнам, Пошкырт кундемнам, пÿтынь элнам йöраташ туныкта, икте-весе деке поро кумылым шочыкта. Йöратыза шочмо йылмынам!

О. ШАГИЕВА, Арлан школын тÿҥалтыш класслаштыже туныктышо. Краснокам район. 

Школын 4 классын тунемшыже-влак шочмо йылмышт нерген теве кузе ойлат:

С. КОНСТАНТИНОВА: Мый школыш кажне кечын куанен коштам. Чыла предмет денат сайын тунемаш тыршем. Марий йылме урокымат йöратем. Тиде урокышто ме лудына, возена, туштым туштена, марла кутырена. Ешыштат марла мутланена. Эше мылам спорт келша: кеҥежым куржталам, телым ече дене коштам. Мый шочмо йылмым йöратем.

Л. ЭТУКОВА: Мемнан ешна кугу, чылаже индешын улына. Еш - тиде эн лышыл еҥ-влак. Ачам «НЕФАЗ» заводышто слесарьлан ышта. Яра жапыштыже авамлан кудывечыште полша. Линда акам ешыж дене Нефтекамск олаште ила, стоматолог-техник улеш. Кок изирак акам-влак Ижевск олаште медколледжыште тунемыт, Лев изамат - студент, Нефтекамскыште электрик лияш ямдылалтеш. Лена, Лия акам-влак да мый школышто тунемына. Мый ешыште эн изи улам. Ме ешыште келшен, икте-весылан полшен илена. Мый нуным поро улмыштлан пеш чот йöратем.