«Школ ялым куча»

2023 ийыште «Модернизация школьных систем образования» федеральный программа почеш Сокто школым капитально олмыктеныт. Тышке икшыве-влак Сокто, Писарево, Анисимова Поляна, У Князь, Владимировка, Дражжево ялла гыч тунемаш коштыт. Нуным школ автобус шупшыкта. Но яллаште самырык-влак шагалын кодыныт: шукышт Шараныш, южышт олашке илаш кусненыт. Кызыт школышто 52 йоча тунемеш, 15 туныктышо пашам ышта. Туге гынат школын пашаче ешыже вуйым ок саке, туныктышо-влак йӧратыме сомылыштым умбакыже шуктат да улшо икшыве-влаклан кӱлеш шинчымашым да воспитанийым пуаш тыршат.

Школым 1986 ий годсек Святослав Владимирович Гареев вуйлата. Тений директор сомылым шуктымыжлан 40 ий лиеш. Тыршен пашам ыштымыжлан «Россий Федерацийысе образованийын отличникше» почётный знак дене палемденыт.

Тиде школ районыштына марий ялласе школ-влак кокла гыч эн мотор да эн сай. Тыште, йоча-шамычлан чыла шотыштат сай лийже манын, зданийын архитектурыжымак тыге шонен ыштыме докан. Волгыдо да кугу класс-влак, спортзал, тӱрлӧ мероприятийым эртараш актовый зал да моло пӧлем-влак улыт.

Сайын тунемаш чыла йӧн уло. Пеш шуко олмыктымо пашам шуктымо: окна ден омса-влакым вашталтыме, леведышым, тыгак олтымо, вӱдым пуымо, канализаций, электроснабжений системым шотыш кондымо. Вентиляцийым тӧрлымӧ, пожарым йӧртымӧ системым ыштыме. Кӱварыш керамогранит плиткым пыштыме, линолеумым шарыме. Школ кӧргым йӧршын уэмдыме. Тылеч посна чыла кабинетым у оборудований, учебно-наглядный пособий да оформлений дене пойдарыме.

Сокто школышто капремонтым кузе ыштымым лӱмынак ончалаш мийышым. Шке шинча дене ужмым нимо денат таҥастараш ок лий! Пиалешем, тиде кечын, 30 декабрьыште, школышто У ий пайремым эртарат ыле. Йӱштӧ Кугыза ден Лумӱдырым, йомакысе моло герой-влакымат ужаш логале.

«Школна ончыкыжат пашам ыштыже, ынже йом манын тыланен илена. Вет тудын илыш-йӱлаже моткоч поян, шулдыржо йымач ятыр лӱмлӧ еҥ лектын, кажныже илышыште шканже верым муын. Школ вет ялым куча…» - каласыш чеверласыме годым Святослав Владимирович.