«Вуемым шым саке, илашак тыршышым», -

Н.А. Минликаева 1964 ий 19 сентябрьыште шочын. Ялысе кандашияш школ деч вара, туныктышо лияш шонен, Благовещенск педучилищыш тунемаш пурен. Ныл ий студент жап пеш вашке эртен. Практика, кажне уроклан тыршен ямдылалтмаш, баян дене тӱрлӧ семым шокташ тунеммаш, пелйÿд эртымеш, труд уроклан кÿлшӧ наглядностьым ямдылымаш, йолташ-влак дене тÿшкагудышто келшен илымаш ушеш келге кышам коденыт.

Педагогический паша корныжо 1983-шо ийыште Еммет ялысе пелекыдалаш школышто тÿҥалын. Тудлан 1-ше классым ÿшанен пуэныт. Теве ынде 43-шо ий тÿҥалтыш классласе тунемше-влакым кокымшо ава семын йӧратен туныкта, шинчымашым пуа. Тачысе кече мартеат ойырен налме профессийжылан ÿшанле кодын. Чылаже 14 выпускым луктын, кызыт 2-шо классым туныкта. Тудын тунемшыже-влак элнан тÿрлӧ кундемлаштыже илат да пашам ыштат. 20 выпускникше туныктышын пашажым ойырен налын. Светлана Яношевна Сыртланова, 2005-ше ийыште школым тунем лектын, Российысе Кӱшыл образований да наука министерствын Проект паша департаментшын кӱшыл экспертшылан ышта. 

Н.А. Минликаева тыгак 10 ий марий йылме да литератур урок-влакланат вуйын шога, ятыр мероприятийым эртарен, шуко тунемшым олимпиадылан да конкурслан ямдылен. Марий шÿлышан туныктышо калыкнан йылмыжым, тÿвыражым, йÿлажым арален кодышаш верч кугу пашам шукта. Ача-ава-влак да ял калык денат кылже пеҥгыде, Шаран районысо марий мер ушемын еҥже улеш. Кӱшыл категориян туныктышо «Паша ветеран» лÿмым сулен налын, еш архивыштыже ятыр Чап грамот да тауштымо серыш аралалтыт.

Нина Асылгалеевна 1985-ше ийыште ик классыште пырля тунемме, шке ялысе рвезе Григорий Адыевич Минликаев дене еш илышым чумырен. Пелашыже Нурей школышто военруклан ыштен. Стерлитамак оласе физкультурный техникумым тунем пытарен, тале спортсмен лийын. Ик жап гыч шочмо ялысе школыш куснен да физкультурым туныкташ тÿҥалын. Тыге Нина ден пелашыже 20 ий ик школышто тыршеныт, йӧратыме пашаштым уло кумылын шуктеныт. Григорий Адыевич ятыр тале спортсменым куштен. 

Минликаевмыт кум ÿдырлан илышым пӧлекленыт. Пӧртым ыштен, куанен илышаш веле ыле, но вучыдымын Григорий Адыевичын шÿмжӧ кырымым чарнен. Тыге 41 ияш Нина Асылгалеевна кум изи икшыве дене пелаш деч посна кодын. Тунам Кристина 12, Виктория 7 ияш лийыныт, а изи Полиналан 2 ият темын огыл. Туныктымо паша, вÿта тич вольык, изи икшыве-влак - чылашкыжат шуаш кÿлын. Кугу ойгым чытен лекташ икшыве-влак да кӧргӧ вий-куат полшеныт. «Вуемым шым саке, илашак тыршышым. Икшыве-влакым туныктыман, йолÿмбак шогалтыман, илышыште шке верыштым муаш полшыман манын шонышым. Пелашем дене у пӧртым чоҥаш шонымынамат шкаланемак шукташ перныш. Изам-шольым, акам-шÿжарем-влаклан, ачамлан кугу таум ойлем, нуно чот полшышт, ÿшанле эҥертышем лийыч. Тиде мыланем вийым пуэн, йӧсым сеҥен лекташ полшен», - каласкала педучилищыште пырля тунемме йолташем.

Кызыт ÿдыр-влак кугемыныт, кажныже илышыште шке вержым муын. Кристина маляр-штукатурлан тунемын, ешыж дене Тумбагуш ялыште ила. Тÿрлӧ пашамат шукташ мастар. Виктория аважын корныжым тошка, луымшо ий тÿҥалтыш классласе тунемше-влакым туныкта. Благовещенск педучилище деч вара, паша деч кÿрылтде, Акмулла лÿмеш БГПУ-што шинчымашым поген. Тале спортсмен, район да республика кÿкшытыштӧ эртарыме тÿрлӧ конкурсын сеҥышыже. Пелашыж дене Шаран селаште илат. Виктория Григорьевна 2-шо номеран школышто тырша, пелашыже - физкультурым туныктышо, спортшколышто инструктор улеш. Полина БГМУ-што 6 курсышто вирусолог врачлан тунемеш да тыгодымак Уфасе больницыште медсестралан тырша. Университетын илышыштыжат шкенжым сай могырч ончыкта, волонтёр сомылым намия, мураш-кушташат, спортланат шÿман. Теве тыгай тыршышан, аваштын ÿшанжым сулышо ÿдыр-влакым ончен кугемден Нина Асылгалеевна. Таклан огыл республика кÿкшытыштӧ эртарыме «Женщина - мать нации» (2019 ий) конкурсышто финалыш лектын, тудым диплом да тауштымо серыш дене палемденыт. Н.А. Минликаеван илыш корныжым шергал лектын, тыге каласыме шуэш: «Ончыкыжат шуктен шогымо пашат, тунемшет, икшывет-влак куандарен шогышт. Илышет пиалан лийже». «Икшыве-влакын чыла сай гын, мыят пиалан улам», - иктешлен каласыш йолташем.