Кузе туныктет - тугай айдемым куштет

Йоча-влак арням кум тапкырлан шеледен, тыршен ямдылалташ пижыч.                       

Эн ончычак, икте-весышт дене таҥасен, эн кугу але эн изи пареҥгым мӧҥгышт гыч конденыт. Тиде пакча-саска ден кылдалтше тӱрлӧ-тӱрлӧ модышлам шарналтен, веселан, сеҥышыш лекташ тӧчен, модыч. Воштылчык йӧршан модмашым туныктышо Марина Япарова эртарен. 

Вес кечыжым адакат урок кокласе каныш тат еда ямдылыме номерыштым модын ончыктеныт: нылымше классыште тунемше Ксения Шуматбаева  Миклай Казаковын «Кокымшо кинде» почеламутшым пеш устан каласкален пуыш; кумшо классысе ӱдыр-рвезе-влак Юлий Тувимын «Пакчасаска» («Овощи») почеламутшым сем почеш муралтен колтышт, эсогыл артист мастарлыкыштат уло; а кокымшо классын Никита Шуматбаев ден Катя Айнушева пареҥге нерген литератур гыч могай шинчымашым, оҥайым пален налмышт нерген чыланнамат палдарышт; икымше классыш коштшо икшыве-шамыч «Антошка» мурым келыштарен модын ончыктышт.

Кумышо, пытартыш тапкырлан кодымо жапат шуо. Эрден-эрак йоча-влак икмыняр сумка але пакет ден толыныт. Чылан кугу переменым тӱсен-тӱсыде вучат, икте-весыштым аптырандарынешт, коеш.  Тачысе сомыл - тиде пареҥгым кучылтын, могай-гынат кочышым ямдылыме кече. Коридореш ныл ӱстел шижде тылыкак темын шинче. Иктыжат вараш ынеж код! Лыҥ кочыш, мо гына уке: пареҥгекогыль, пареҥгеперемыч, шке ыштыме «чипс»етат коеш, пареҥгымелна – «драники» манмет. Пуйто ожнысо кугу пайрем сий погымо. Чыла тидым йоча ден пырля ава-кова тыршеныт докан. Кочкаш тӱҥалме деч ончыч кажыже каласкалаш тӧча, кӧ полшен, кузе ышталтеш. Школышто шолтышо поварланат паша ешаралте, тудыжо конкурслаш кондымо кӱчымӧ пареҥгыштым «лош шелын» шолтен, ушкал ӱй ден лоҥын, икмыняр вере шындылын. Тиде тӱҥ кочыш чылаланнат эн чот келшен.

«Поян шыже» пайрем кошартыме кече школысо уло йочам да кугыеҥым шер теммеш сийлен, артенат кодын. Арам огыл шоҥгыеҥ манын: «Пареҥге - кокымшо кинде». Тиде чын деч чын. 

Эртарыме мероприятий-влак коклаште тиде арня мардеж гай писын чоҥештен кайыш. Могай иктешлымаш? Тӱшка паша келшымашым вияҥда.

Кызытшым, тӱҥалтыш йыжыҥысе йоча да туныктышо-влак аван кечыжлан кыртмен ямдылалташ тӱҥалынна. Тунемме кокла гыч яра жапым муаш тӧчен, класс деч ӧрдыжысӧ паша вий-куатым ешараш полша.