Шыже каникул кужунрак шуйна

Нуно 25 октябрь гыч 4 ноябрь марте каналтат. «Тунемме календарь почеш, 1-11 класслаште тунемше-влакын каникулышт 25 октябрь гыч 2 ноябрь марте шуйна. Тенийсе идалыкын ойыртемже уло - каникул деч вара вигак элыште кугыжаныш пайремым - 4 ноябрьыште Калык-влакын икоян улмо кечым - палемдат, тиде каныш кече. Тыгеракын йоча-влаклан  25 октябрь гыч 4 ноябрь марте каналташ йӧн лиеш, парт коклашке нуно 5 ноябрьыште шинчыт», - увертарен шке соцлаштыкыштыже БР просвещений министр Ильдар Мавлетбердин. Тудо ава-ача-влаклан каникул жапыште йоча-влакын лӱдыкшыдымылыкышт шотышто тӱткӧ лияш кӱлмӧ нерген ушештарен да ӱдыр-рвезе-влаклан каникулым пайдалын эртараш тыланен.