Педагог пашам пагалат, ончычсымат порын шарнат

Тунемше-влакын усталыкышт - тиде туныктышын мастарлыкше гоч нунын деке куснышо поянлык. Йоча-влак пайрем концертыште чыла могырымат шкеныштын моштымашыштым почын пуаш, туныктышышт-влаклан келшаш, нуным куандараш тыршышт. Коллегышт-влак лӱмеш тиде пайремым ямдылыше туныктышо-влак Л.М. Атналина, Т.В. Ахмадиева, Э.Р. Тамиева  да артист рольым шке ӱмбакышт налше тунемше-влак тӱшка усталыкышт дене тиде кечын школышто пуйто посна юзо кугыжанышым чоҥышт.  Верысе клуб пашаеҥ Снежанна Гараеван пырля ушнымыжо пайремым утларак сӧрастараш полшыш, мотор мурыжо-влак  дене туныктышо-влакын кумылыштым нӧлтале. Эше тачысе педагог-влакын туныктышыштым, сулло канышыште улшо, тений йыргешке лӱмгечыштым палемдыше педагогика пашан ветеранже-влакым - Н.И. Ахмадиевам, Е.Д. Минилбаевам, М.А . Айдимировам - порын саламлышт. Сергей Есенинымат шарналтышт, вет лач тудо кечын, 3 октябрьыште, лӱмлӧ руш поэтын шочмыжлан 130 ий теммым элыштына палемденыт. Тунемше-влак Екатерина Шакирова ден Андрей Сайпушев поэтын почеламутшо негызеш возымо муро почеш пеш оҥай сценкым модын ончыктышт.

Павасола школышто тукым  гыч тукымыш куснен толшо педагог профессий шке кӱкшытшым ончычсо семынак куча, школ коллективыште икте-весым пагалымаш, йоча-влакын  туныктышыштым йӧратымышт тидым рашын ончыктат.