5 октябрь - Туныктышын кечыже. 45 ий шинчымаш аланыште

Валерий Исанбаевич Исаев 1960 ий  1 январьыште  Шаран районысо Куртетал  ялыште шочын. Тӱҥалтыш класслаште шочмо ялыштыже тунемын. 1977 ийыште  Зирикле кыдалаш школым тунем лектын.  Рвезылан утларак биологий, химий, географий келшеныт. Тудо спорт дене кылым кучен, районысо таҥасымашлаште шуко гана школын чапшым арален. 1978-1980 ийлаште Совет Армий радамыште служитлен. Службыжо Грузийыште, автомобильный войскаште, эртен.

Валерий Исанбаевич 45 ий туныктымо аланыште тырша, 37 ий директорлан ышта, тыгак ОБЗР урокым намия. Паша корныжо Зирикле школышто тӱҥалын, тушто НВП урокым намиен, вара очно институтыш тунемаш пурен. 1980-1985 ийлаште   Казаньысе кугыжаныш педагогика институтын «Физическое воспитание и начальное военное обучение» факультетыштыже шинчымашым поген, «преподаватель начального военного обучения и физического воспитания» специальностьым налын. Институтым йошкар диплом дене тунем лектын. Распределений почеш самырык специалистым Татарстан Республикын Бугульма районысо Подгорный школышкыжо  физкультурым да НВП туныкташ колтеныт.

Валерий Исанбаевич ятыр ий физкультур урокым намиен, йоча-влакым спортлан шӱмаҥден. Спортын тӱрлӧ видше дене таҥасымашлаште нуно эре ончыл верым наледеныт. Пашаште сай сеҥымашыш шумыжлан Валерий Исанбаевичым «Россий Федерацийысе Общий образованийын почётный  пашаеҥже» нагрудный знак, «Лучший работник физической культуры ТАССР» лӱм, республикысе Образований министерствын шуко Чап грамотыжо да таумутан серышыж дене палемденыт.

Галина Султановна Исаева (Абхаликова), Шаран район Еммет ялын ӱдыржӧ, 1960 ийыште шочын. Ялысе школым  тунем лекмеке, Благовещенск оласе педагогика училищыш марий отделенийыш тунемаш пурен. 1980 ийыште шочмо районышкыжо тӱҥалтыш класс-влакым туныктышо лийын пӧртылын. 1981-1986 ийлаште Марий кугыжаныш педагогика институтышто филологий факультетыште заочно тунемын. «Руш йылмым да литературым туныктышо» специальность дене дипломым налын. 

Туныктымо паша корныш икымше ошкылым ыштымыжлан тений 45 ият темын. Пел курым наре жап эртен, но Галина Султановнан шинчаже ончычсо гаяк шӱдырла чолгыжын йӱла, порын ончал колта. Уста туныктышо вачӱмбакыже 65 ийым пыштен гынат, йӧратен ойырен налме пашажым - йоча-влакым  руш йылме да сылнымутлан шӱмаҥдыме сомылым - умбакыже шуя. Паша лектышыжат куандарыше: тунемшыже-влак руш йылме дене  ЕГЭ-м да ОГЭ-м сайын сдатлат, руш йылмым сайын палымыштым республика, район кӱкшытыштӧ ончыктат: конкурслаште, олимпиадылаште, научно-практический конференцийлаште сеҥат.

Туныктышышт нунылан шкежак сай пример улеш. 2011 ийыште Галина Султановна Россий Федераций Президентын «Наш лучший учитель» грантшым сеҥен налын,  2013 ийыште тудым РФ Образований да наука министерствын Чап грамотыж дене палемденыт, 2016 ийыште  Татарстан Республикысе Образований Министерство Таумутан серыш дене суапландарен. 

Галина Султановна  ден Валерий Исанбаевич кок  икшывым ончен куштеныт. Нунат туныктышо лийыныт, ава-ачаштын корныштым тошкат. Алексей эргышт Гражданский защита академийыште (АГЗ) тунемын, инженер-спасатель. Москваште РФ МЧС-ын «Национальный центр управления в кризисных ситуациях» учрежденийыштыже пашам ышта, подполковник. Тудо тыгак «педагогическое образование» направлений да «физическая культура» профиль дене Александр Григорьевич ден Николай Григорьевич Столетовмыт лӱмеш Владимирский кугыжаныш университетыште тунемын. Яра жапыште тренер пашам шукта. Лыжероллер дене таҥасымаште кок гана Москван да Московский областьын кубокшым сеҥен налын, Российын чемпионжо, спорт мастер улеш. Марина ӱдырышт школым ший медаль, Казаньысе федеральный университетын географий факультетшым йошкар  диплом дене тунем лектын. Тудо КФУ-н Экологий, биотехнологий да пӱртӱс дене пайдаланыме институтшын метеорологий, климатологий да атмосферын экологийже шотышто кафедрын старший преподавательжылан ышта, географий  наука кандидат. 

«Родо-тукымыштына туныктышо-влак ятыр улыт. Пошкудыштына икымше туныктышем ила ыле. Тидланак, очыни, школ пашам изинек йӧратенам. Шӱжаремат Благовещенск педучилищым тунем лекте. Мый школышто 1980 ий гыч ышташ тӱҥалынам да кызытат тыршем. Тиде паша деч посна иленат ом керт. Пелашем дене Бугульма районысо Подгорный посёлкышто пашам пырля, ик вере, ыштена. Тиде школышто тыршымылан тений 40 ий теме. Мый руш йылмым да литературым туныктем, пелашем школ директор да «ОБЗР» предметым туныктышо улеш. Школышто гуманитарный предметым туныктышо-влакын методушемыштым вуйлатем. Пашам йӧратен ыштем», - куанжым шылтыде мучашлыш Галина Султановна.

Исаевмыт ешын фотокартычкыштым ончем да шонем: чынжымак, могай нуно кугу кӧргӧ виян, пиалан улыт. Марий калыкын лӱмжым кӱшкӧ нӧлтышӧ тыгай уста туныктышо-влак дене кузе от кугешне!  Нунылан пеҥгыде тазалыкым, ешыштышт чыла сайым да туныктымо пашаште сеҥымашым тыланем.