-23 °С
Раш
Все новости
Шинчымаш кугорнышто
5 Сентябрьыште 2025, 20:23
Салам, школ, у тунемме идалык!
Кеҥеж каникул эртыш, у тунемме ий тӱҥале. Шинчымаш кечын ме Андреевка школыштынат линейкым эртарышна. Тыште тӱҥ герой-влак - тиде, конешне, 1, 9 да 11 класслаште тунемше ӱдыр-рвезе-влак. Ондак мотор сем почеш икымше туныктышышт А.Р. Мезенцева дене пырля мотор, куаныше 1 классыште тунемше-влак лектыч. Нунын деч вара класс вуйлатыше Н.В. Пензина дене пырля 9 классын тунемшыже, класс вуйлатышышт В.А. Яникаева дене пырля 11 классыште тунемше ӱдыр-рвезе-влак койылалтышт. Российын флагшым 11 классын тунемшыже Д. Тебеньковлан, Башкортостанын флагшым 11 классын тунемшыже В. Иксановалан, Илиш районын тистыжым нӧлталаш А. Юнусовалан ӱшанышт.
Авторын колтымо фото-влак.
Линейкым директор Ф.Ф. Ситдиков почо. Тудо 7 классын тунемшыже Я. Зайнитдиновалан Уфа олалан 450 ий темме лӱмеш ямдылыме оҥай кроссвордшылан дипломым, директорын советникше Г.З. Семеноваланат тауштыме серышым кучыктыш. Илиш районым вуйлатыше И.И. Мустафин 11 классын тунемшыже-влак Д. Тебеньковым да В. Иксановам тунеммаште, тӱрлӧ олимпиада ден конкурслаште сай лектышым ончыктымыштлан грамот, шарнаш кодшо пӧлек дене суапландарыш. Тунемше-влаклан поро тыланымашым сельсоветын вуйлыкшо А.М. Закиров, школнан выпускникше, нефть да газ промышленностьын сулло пашаеҥже, меценат, Илиш районын почетный еҥже Р.Р. Сафин, педагогика паша ветеран-влакын лӱмышт дене З.Г. Латипова ойлышт. Икымше гана парт коклашке шичше ӱдыр-рвезе-влак почеламутым каласкалышт, мурым муралтышт. 9, 11 класслаште тунемше йоча-влак нунылан шарнаш кодшо медальым пӧлеклышт.
Пайремын чоным вургыжтарыше татше - икымше йыҥгыр! У тунемме идалыкыште икымше йыҥгырым рӱзен ошкыл эрташ 11 классын тунемшыже Д. Тебеньковлан да 1 классын тунемшыже С. Рашитовалан ӱшанышт. Тений икымше классыш 8 тунемше - 4 ӱдыр ден 4 рвезе - тольыч, а 11 классыште 4 тунемше веле - 4 эрге да 4 ӱдыр.
Новости партнеров