+18 °С
Дождь
Шинчымаш кугорнышто
19 Мая 2025, 13:06
Эртыше - тошто огыл, уым кычалаш полшышо
Музейын тӱнямбал кечыжым пытартыш ийлаште элыштына «Музейын йӱдшӧ» семын палемдат. Тений тиде акцийым 17 майыште «Сеҥымашын Геройжо-влак» тема дене келыштарен эртарышт. Мемнан Кужнур ялыштынат Марий калык этнографий музей уло. Тудым ончычсо эмлымверын ик пӧлемыштыже почмо ыле. Модульный ФАП-ым чоҥымо деч вара тошто эмлымверым пӱтынек музейлан пуышт, тыге тудо кугеме да утларак пойдаралте.
Авторын колтымо фото-влак.
Ялысе тоштерым Н.Я. Мишенькина вуйлата. Тудо шукертсек тушто пашам ышта. Музейым почмаштат надырже кугу, чыла тиде тӱҥ шотышто тудын пашаже негызеш ышталтын. Музейыште мо гына уке: марий вургем, озанлыкыште, суртышто кучылтмо тӱрлӧ ӱзгар, тошто годсым шарныктыше сӱрет, фотографий-влак да молат. Экспонат-влак марий йӱла, вургем да арвер-влак нерген гына огыл, Кугу сар годсо илыш нергенат каласкалат. Тыгай поянлыкым саклен, калыклан ончыктен, ушештарен шогымо суапле пашам шуктымыжлан Наталья Ярминькиновналан кугу таум каласыме шуэш.
«Музейын йӱдшым» эртарымашке йоча-влакат чолган ушнышт. Нуно почеламутым ямдыленыт ыле, мурымат муралтышт, южышт кочашт нерген шарналтен ойлышт. А вара чылан музейыш пурышна. Шке шинча дене ужмо йоча-влакын ушеш утларак шыҥдаралт кодеш: тошто годсым ончен, мом-гынат уым, шӱм-чоным пойдарышым, шонкалаш таратышым пален налаш лиеш. Тыгай мероприятийым лач тыге аклаш лиеш.
