Латныл ий йоча-влакым шочмо йылмылан шӱмаҥда

Нунылан кугыжаныш наградым, а самырык туныктышо-влаклан грантлан сертификатым Башкортостан Вуйлык Радий Хабиров кучыктен. Тудын пунчалже почеш селасе школлаште ыштыше самырык-влаклан тыгай кугыжаныш полышым 2019 ийыште пуаш тӱҥалыныт. Тений тудын кугытшо 690 тӱжем теҥге лийын. 

Грантым налше 150 самырык туныктышо коклаште Дӧртыльӧ район Чарлак школын туныктышыжо Т.Г. Аптулаеват лийын. Татьяна Григорьевна ялысе школышто латныл ий пашам ышта, кугурак класслаште марий йылмым да литературым туныкта. Тудо Благовещенск педколледжым, Бирск кугыжаныш педагогика академийын филологий факультетшым тунем лектын. Кӱшыл категориян туныктышо улеш. Тыршен ыштыше педагогын тӱҥ сеҥымашыже - тиде келге шинчымашан, ушан-шотан тунемшыже-влак. Татьяна Григорьевнан тунемшыже-влак туныктышышт деч примерым налыт - эре ончылно лияш тыршат. Нуно марий йылме да литератур дене районысо олимпиадыште, лудшо-влакын конкурсышто эре призовой верлам наледат, тӱрлӧ конкурслаште сеҥышыш лектыт. Татьяна Григорьевна Россий кӱкшытан призерымат ямдылен - шочмо йылме дене йӱдвел-эрвел олимпиадыште тунемшыже кокымшо верым налын.