Педагогика пашан ветеранже-влакын вашлиймашышт

Ямле муро да куштымашан пайрем концерт лие. Порылыкым да пагалымашым ончыктышо пайрем дене мемнам школ директор С. Мусина саламлыш. «Калтаса селасе 2-шо школым почмылан тений 33 ий лиеш. Чаманен ойлаш логалеш, ме школлан негызым пыштыше да тудын икымше директоржо М.И. Илтубаев дене чеверласышна», - каласыш тудо. 

Илыш умбакыже шуйна. Сентябрьыште тиде келшен илыше педколлектив обслуживающий трудым туныктышо В.Л. Арсеньеван, йоча-влакым географийлан шӱмаҥдыше К.И. Тимиряеван йыргешке лӱмгечым палемдыме куаныштым лош пайлен. Кидым рӱж совен, ме тӱҥалтыш военный подготовкым туныктышо П.Н. Батыровым 90 ийым темыме чапле юбилейже дене саламлышна. 47 ий англичан йылмым туныктышо Н.Г. Нургалеева лӱмешат шуко поро шомак йоҥгыш. 

Ӱстел йыр пырля чайым йӱмаш, модмаш, сценка, йӧратыме муро, тунемше-влак деч пеледыш да пӧлек - тиде кечын куандарыше тат ситышын ыле. Педагогика пашан ветеранже-влакым тыге кумыллын вашлиймыжлан школ коллективлан кугу таум каласена. Мыламат тушто лияш пиал логале. Уфасе «Зеленая роща» санаторийыште 1 октябрь гыч эртарыме Кугурак тукымын декадыже, тыгак ноябрьыште Сочи олаште кугурак ийготан-влаклан тазалыкын, спортын фестивальышт лийме нерген увертарышым.