Ӱмырышт мучко образований да воспитаний аланыште тыршеныт

Нуным район администраций вуйлыкын социальный йодыш шотышто алмаштышыже Л.Г. Александрова, образований пӧлкан пашаеҥже Л.Ф. Мустафина, районысо ветеран-влак Советын председательже Ю. Г. Балахнина, райоынсо образований пашаеҥ-влакын профсоюз ушемыштым вуйлатыше А.С. Килинбаева, «Путник» туризм рӱдерын директоржо В.А. Князев саламлаш миеныт ыле. 

Уна-влаклан рӱдерыште ондак экскурсийым эртарышна. Педагогика пашан ветеранже-влак музейыште районысо образованийын историйже нерген каласкалыше пӧлкам поснак кумыллын ончышт. Вара чылан, пайрем ӱстел йыр погынен, чайым йӱыч. Вашлиймашым 1-ше лицейын 4Б классыштыже тунемше-влак, Мишкан селасе йоча искусство школышто шуаралтше Ангелина Кузнецова мурымаш-куштымаш дене сӧрастарышт. «Путник» рӱдерын методистше-влак Д.О. Алиева ден Н.В. Шаркаева паша ветеран-влаклан мыскара экзаменым ямдылышт. Нунышт пашам ыштыме жапыштым шарналтышт, илышыштышт лийше оҥай, куанле тат-влак нерген каласкалышт. Вашлиймашым эртараш ме спонсорна-влакын полышыштлан, профсоюз организацийлан эҥертышна. Тиде индивидуальный предприниматель-влак А.В. Петрова, В.Г. Антонова, Н.А. Салмиянова, Т.М. Дмитриева, К.В. Шамиданова, Э.Р. Гильманова. Тыгак полшымыштлан рӱдӧ библиотека системым вуйлатыше Т.А. Кондогиналан, Мишкан селасе 1-ше лицейын директоржо Е.В. Малмыгинлан, йоча искусство школын вуйлатышыже Д.С. Аликаевалан тауштена.

Шергакан туныктымо пашан ветеранже-влак! Тыланда эреак пагалыме да почетан айдеме лийын кодаш, тыгак кужу ӱмырым, пиалым тыланена. Илышыштыда куанле тат шукырак лийже.