Илышыште шке вержым муын

Марианна Владимировна Краснокам районысо Кыргыз ялеш шочын-кушкын. Школ деч вара Нефтекамск педколледжыште тӱҥалтыш класс туныктышылан тунемын, вара Бирск кугыжаныш пединститутышто шинчымашым поген. 

Келге шинчымашан педагог М.В. Шамратова ойыртемалтше икшыве-влак дене пашам ыштыме йӧн-влакым сайын пала да шинчымашыжым туныктымаште моштен кучылтеш.

2015 ийыште республикын йӱдвел-касвел ужашыштыже верланыше кугыжаныш бюджетный коррекционный общеобразовательный учреждений-влакын педагогышт коклаште «Идалыкын туныктышыжо» конкурсышто кокымшо верым налын. Вич ий гыч «Школ - тазалык вер» IV Всероссийский конкурсын мемнан  кундемысе этапыштыже «Тазалык технологийым кучылтмо урокын эн сай конспектше» номинацийыште сеҥышыш лектын.

Шке паша опытшым иктешлен, ятыр статьям воза да нунын дене тӱрлӧ конференцийлаште палдара. «Кушкын толшо тукымым шуарымаште шочмо йылмын да калык йӱла-влакын рольышт» статьяжым «Башкортостан Республикыште калык-влак кокласе кылым пеҥгыдемдымаште шочмо йылмын рольжо» республикысе шанче-практик конференцийын сборникыштыже савыктеныт. 

Марианна Владимировнан тунемшыже-влакат тӱрлӧ конкурсышто вийыштым тергат. «Сарын чын корнылаже» республикысе сылнымут лудмаш патриотический, «Ончо - тиде Россий» Всероссийский видеоролик, «PROдвиг» республикысе сӱрет да плакат-влак конкурслаште, моло вере ончыл верлам наледат.

Туныктышылан шкаланжат эре шинчымашым пойдарен шогыман. Марианна Владимировна квалификацийым нӧлтымӧ курслаште, «Кугыжаныш да муниципальный управлений» программа дене «Кӱрылтдымӧ шинчымашым пуышо да инноваций рӱдер» ешартыш профессионал образований пӧлкаште тунемын.

М.В. Шамратова школыштына нылымше ий школ вуйлатышын туныктымо паша шотышто алмаштышыжлан тырша. Тыршен ыштымыжлан тудым Россий Федераций Просвещений министерствын, Башкортостан Республикысе Образований министерствын Чап грамотышт дене палемденыт.