Тӱҥ педкаҥаш могай вияҥме корным палемден?

Тудо республикысе образований системым вияҥдыме корнын тӱҥ задачыже-влаклан тӱткышым ойырен. Тыште специальный военный операцийлан полышым пуымо сомылын кӱлешлыкшым палемден. Образованийын качествыже саемме, Всероссийский олимпиадылаште сеҥыше шукемме, школым чоҥымо йодыш-влакат ӧрдыжеш кодын огытыл: кундемыште вич ийыште 22 тӱжем верлан 44 школым, 9173 верлан 65 йочасадым, тений Уфа, Туймаза олалаште, Иглин селаште эш кум школым чоҥымо, кок ийыште 140 школ зданийым капитально ачалыме, тений 31 школым ачалаш тӱҥалме нерген увертарен. Радий Хабиров тыгак кыдалаш профобразованийым пуышо системым вияҥдаш кӱлмӧ йодышым тарватен. Тудо регионысо предприятий-влаклан самырык да квалификациян кадр-влакым ситарышаш. «Промышленностьлан пашаче кид ок сите. Колледж-влак мемнан экономикылан кадрым ямдылат. Тидлан кӧра 19 колледж «Профессионалитет» федерал проектыш ушнен», - каласен республика Вуйлык. Педкаҥашыште тыгак полилингвальный образованийлан, тунемме программым уэмдымылан, талантан икшыве-влаклан шуаралташ йӧным ыштымылан, олимпиадылаште сеҥыше да республикысе вузлаш тунемаш пурышо самырык-влаклан окса полышым пуымо, мошенник-влак деч аралалтме йодышлам лончыленыт. Паша условийым саемдыме шотышто Радий Хабиров туныктышо-влаклан 2025 ий гыч софинансирований йӧн дене республикысе санаторно-курортный учрежденийлаш кок арнялан путевкым пуаш темлен, профильный министерствылан тиде йодышым шымлаш шӱден.