Математикым изинек йӧрата

Тыгай кӱкшытыш чарныде ончык ошкылын, палыдымым умылаш тыршен гына шуаш лиеш. Тунемше пелен эре полшен, умыландарен, виктарен, чын корным ончыктен моштышо уста туныктышат лийшаш. Тиде чумыр паша лектыш, садлан туныктышо ден тунемшын тыршымыштым пырля, иктӧр аклыман да когыньыштымат мокталтыман.

Эльвира Геннадьевна шке туныктымо предметшым моткоч чот йӧрата да сайын пала. «Школышто тӱҥалтыш класслаште тунемме годымак задача ден пример-влакым куштылгын шотлем да моло-влакын заданийым ыштен пытарымыштым вучен шинчем ыле. Кугурак класслаште математикым авам туныктыш. Мыйынат математика «вӱрышкемак шыҥен» дыр, вет ачам ден авам коктынат 1967 ийыште Благовещенск педучилищым тунем пытареныт да, сулен налме канышыш лекмеш, Ардаш кыдалаш школышто математикым туныктышылан тыршеныт.

Ачам, Геннадий Айгузинович Айгузин, паша деч кӱрылтде, Бирск кугыжаныш пединститутышто физика да математика факультетым тунем лектын, паша стажше 42 ийыш погынен. Авам, Светлана Ахметзяновна Бадамшина, Йошкар-Олаште Марий кугыжаныш пединститутышто тӱҥалтыш класслаште туныктымашын педагогикыже да методикыже факультетыште кӱшыл шинчымашым налын, 37 ий школышто пашам ыштен. Калык просвещенийын отличникше, паша ветеран. Тыршен ыштымыжлан тудым БАССР Калык образований министерствын, Калык образований пашаеҥ-влакын профсоюзыштын Башкир обкомжын Чап грамотышт дене палемденыт», - ойла тудо.

Эльвира Геннадьевналанат ача-аважын корнымак тошкаш пӱрен. 1992-шо ийыште Благовещенск педучилищым, 1997-ше ийыште Бирск кугыжаныш пединститутын физика да математика факультетшым очно да эше кок вережат «йошкар» диплом дене тунем лекмек, Мишкан селасе кокымшо школышто туныкташ тӱҥалын да кызытат туштак икшыве-влакым математикылан шӱмаҥда.

Паша опытым погымо семын кажне туныктышын шинчымашыж ден моштымашыже пойдаралтыт. 

- Мый 5-11 класс-влак дене пашам ыштем. Пашаштына тӱҥ семын Петерсонын, Мордковичын туныктымо да методический комплексыштым кучылтына, но тыгодым кажне туныктышын шкенжын шинчалан койшо лектышым пуышо йӧнжӧ-влак улыт. Мыйынат тыгай «наработкем» ятыр погынен, - каласкала кӱшыл категориян туныктышо, Башкортостан Республикысе образованийын отличникше Э. Васюткина. 

- Математикым келгын палыше тунемшыда-влак гыч эше кӧм ойырен каласен кертыда? 

- Математикылан шӱман тунемшем-влакым, ятыр ий эрта гынат, эре шарнаш тӱҥалам. Тунемше-влаклан вуз-влак коклаште математика дене эртарыме олимпиадыште Азамат Фархиев 2-шо степенян дипломым сулен. Владислав Шамурзанов УГАТУ ректорын кубокшылан эртарыме олимпиадыште призер лийын, Лейсан Казыханова 1-ше верым налын, а «Орбита» республикысе полиолимпиадыште призер лийын. Кодший 9-ше классыште тунемше Юлий Аптиев тӱҥ кугыжаныш экзаменым (ОГЭ) 100 процентлан решатлыш да 31 баллым погыш. Мутат уке, тыгай тыршышан ӱдыр-рвезе-влак умбакыжат шинчымашыштым пойдарен шогышт да илышыште шке шонымо кӱкшытышкышт шуышт манын тыланыме шуэш.

- Те вет шкежат Уфашке республикысе тунемше-влакын математика дене возымо ЕГЭ-штым тергаш коштыда. Тыгай пашам кажне кумылан туныктышо шуктен кертеш?

- Тидлан лӱмын ойырен нальыч. Ме Мишкан район гыч кумытын тунемна да экзаменым кучышна. Ынде ты сомылым 8 ий шуктем. Тиде мыланем шкаланемат пеш пайдале: урокышто могай йодышлан кугурак тӱткылыкым, шукырак жапым ойыраш кӱлмым ончылгоч палем. 

Э.Г. Васюткина районысо школлаште математикым туныктышо-влакын методушемыштым вуйлата, регионысо методактивын еҥже улеш. «Идалыкын класс вуйлатышыже» конкурсышто икымше верыш лектын. Республикысе математический турнир ден олимпиада-влаклан сеҥыше-влакым ямдылымылан диплом да таумутан серыш-влак дене, Ю.А. Гагарин лӱмеш кубоклан тунемше-влакын олимпиадыштлан сеҥыше-влакым ямдылымылан, школышто олимпиада толкыным вияҥдымылан Чап грамот дене палемденыт. 

Мучашлан эше ик оҥай факт дене палдарен кодынем. Эльвира Геннадьевнан кочажын тукымжын  - туныктышо-влак Бадамшинмытын да нунын икшывышт ден уныкаштын чумыр педагогический стажышт 650 ий утла погынен. Тушеч 27 ийже - Эльвира Геннадьевнан паша стажше.