Изи гыч кугу сеҥымаш марте

Шаран селасе Йоча усталык да спорт рӱдерын «Эколог-следопыт» ушемыштыже шинчымашым погышо Э. Минькаева «Марий-влак - Европышто чий верам арален кодышо пытартыш калык (шаран-влакын примерышт негызеш)» пашам ямдылен.

Жюри шымлыме пашажым кӱкшын аклен да иктешлымаште кумшо вер дене палемден.

Эрвикан научный вуйлатышыже - Шаран селасе Йоча усталык да спорт рӱдерын ешартыш образований педагогшо Г.Ф. Кучмухаметова. «Ӱдырын аваж ден ачаже, икшывышт чыла шотыштат вияҥже манын, чот тыршат. Шымлыме проектым ямдылыме годымат шагал огыл полшышт», - мокталтен ойла Гузель Фирдатовна.

Эрвика эре «визытанлан» гына тунемеш, шкенжым тӱрлӧ вере терген онча. Районысо тӱвыра пӧртысӧ «Созвездие» ансамбльыште мура, почеламутым сылнын лудмо конкурслашке коштеш. Икмыняр ий почела ачаж дене пырля шахмат дене модмаште вийыштым тергат, писын модмо «Ешем да мый» районысо турнирыште 3-шо верым сеҥен налыныт. 

Республикысе конкурсын финалышкыже логалше кажне йоча - уже сеҥыше. Эрвикам  призовой вер дене шокшын саламлена да умбакыжат тыгаяк чулым лияш тыланена.