Туге гынат 5-ше да 4-ше класслаште тунемше-влак - акаж ден шольыжо Валентина ден Иван Биктимировмыт - шочмо йылмыштым сайын палат гына огыл, эсогыл «Салам лийже, йомак!» районысо конкурсышто коктынат сеҥышыш лектыныт - икымше верым налыныт! Валентина 5-8 класслаште тунемше-влак коклаште таҥасыше тӱшкаште ойыртемалтын, а Иван 1-4 класслаште тунемше-влаклан марла яндарын кутырен моштымыж дене примерым ончыктен. Школышто марий йылмым тунемме урок уке гынат, Биктимировмытын ешыштышт марла кутырат, шочмо йылмым пагалат. Тиде мом ончыкта? Чылажат ЕШ гыч тӱҥалеш. А МО пыта гынат, ТУДАТ еш гычак лектеш... Шочмо йылме шотыштат тыгак.