Мишканыште полилингвальный школ 2023-шо ийыште почылтын. Кызыт тыште 439 йоча тунемеш. Фестивальын практический ужашыже полилингвальный школышто эртыш. В.А. Ибагишева да Н.Я. Александрова уна-влаклан экскурсийым эртарышт. Участник-влак тунемше-влакын проект пашашт дене палыме лийыч. Кажне паша марий калыкын илыш йӱлаже, койыш-шоктышыжо дене кылдалтын ыле. Т.Д. Ишпахтина, Л.М. Хасанова виш урокым, Н.Г. Салиева, А.И. Шамшитова урок деч ӧрдыжысӧ занятийым, А.Л. Юзукбаева, А.В. Ибулаев, А.В. Шамукаев да В.И. Муртазина мастер-классым ончыктышт.
Мишканысе гай полилингвальный шуко профилян школ, кушто марий йылмымат туныктат, Башкортостаныште веле огыл, уло Российлан икте гына. Фестивальын унаже-влак ончылно у тӱня почылтын - марий йылме, культура, калыкнан койыш-шоктышыжо. Толшо-влаклан виш урок-влакым, урок деч ӧрдыжысӧ пашам, мастер-классым, тунемше-влакын проект пашаштым, марий вургемым, мурымаш-куштымашым, калык семӱзгар-влакым ончыктымо, марий калыкын кочкышыж дене палдарыме.
Пленарный ужашым завуч Н.Я. Александрова «Мо? Кушто? Кунам?» модыш семын ямдылен. Йодыш-влак полилингвальный образований дене кылдалтыныт ыле. Тыште кажне директор шкенжын школыштыжо туныктымо паша кузе вораныме нерген ойлен. Чумыр пашам Мишкан районысо образований пӧлка вуйлатыше С.А. Александров иктешлыш.
Уна-влаклан мемнан дене моткоч келшен. Шукышт Мишкан кундемыш икымше гана толыныт. Уфа оласе ик школын директоржо тыге каласен: «Как будто мы побывали в другой стране!»
Фестивальым эртараш полшымыштлан Мишкан районысо тӱвыра пӧлкалан, историй да тӱвыра рӱдерын тӱҥ специалистше А.В. Ибулаевлан, Чорай селасе марий гимназийын туныктышыжо А.Л. Юзукбаевалан, Пӱрӧ оласе историй музейын пашаеҥже А.В. Шамукаевлан кугу таум ойлена.