Марий улмем дене кугешнем!

Уна-влакым саламлыме лӱмеш туныктышо коллектив сылне марла мурым йоҥгалтарыш. А тунемше ӱдыр-шамыч марла куштымашым пӧлеклышт.

В.А. Осипов Волжск районысо Моркиялыште лу икшыван кугу ешеш шочын-кушкын. Ачаже колхоз вуйлатыше лийын, аваже колхоз пашаште тыршен. Мураш-кушташ йӧратыше йочам ава-ачаже школ деч вара Йошкар-Оласе 1-ше музыкально-художественный школ-интернатыш тунемаш колтеныт. Вара рвезе Йошкар-Оласе культурно-просветительский училищыште культорганизаторлан тунем лектын. Училище деч вара уло кумыл дене клубышто тыршен да Волжск районысо Эмеково кыдалаш школышто музыкым туныктен. Тиде жапыштак тудо почеламутым да мурым возаш кумылаҥын. Икымше мурсемжым Альбертина Иванован почеламутшылан келыштарен. Илен-толын, Вячеслав Андреевич Марий кугыжаныш университетын культура да искусство факультетшым тунем лектын, «этнокультуролог» специальностьым налын. Тыге тудо шочмо марий поэзий ден семлан эше чотрак шӱмаҥын. 

Тачысе кечылан В.А. Осиповын йоча-влаклан возымо шӱдӧ кок марий мурыжо уло. 

Вячеслав Андреевичым пӱрымашыже Инна Семеновна Килеева дене ик творческий корныш ушен. Тудыжо Татарстан кундемысе Менделеевский районысо Памашэҥер ялыште шочын-кушкын. Шке жапыштыже культура училищын руш калык муро хоровой пӧлкажым тунем лектын. Вара Менделеевск оласе культура пӧртыштӧ руш муро калык коллективым вуйлатен. А чон шочмо марий мурым кумданрак шараш ӱжын, тыге тудо «Эрвел» мурышо ансамбльым чумырен. Кызыт Йошкар-Олаште ила, марий калык мурым шымла.

В.А. Осипов ден И.С. Килеева творческий ушем семын марий калык илыме верлашке концерт дене коштыт. Марий почеламутым, мурым, куштымаш семым йоҥгалтарат. «Марий калыклан шке шӱлышнам пуаш жап толын шуын. Марий йылме, муро, куштымаш кушкын толшо тукымын шӱм-чоныштыжо лийышт. Ӱдыр-эрге-влак шочмо кова-коча, ава-ачан тӱвыраштым огыт мондо манын ӱшаныме шуэш», - ойлат нуно.

В.А. Осипов Павасола школлан латкум мультимедийный муро сборникшым пӧлеклыш. Уна-влаклан тауштен, вашлиймашым иктешлыме годым тунемше-влаклан Алена ден Эрик Юзыкайнын шомакыштым ушештарышна: «Руш да йот йылмым палаш тырше, чон шӱлышым пуышо шочмо марий йылмынам арале. Тунам тый кугезына-влак гаяк тале лият, моло калык-влакын икшывышт деч нигунам почеш от код».